राष्ट्रीय मीडिया संमेलनात पिंपरी-चिंचवडच्या पत्रकारांचा बहुमान

राष्ट्रीय मीडिया संमेलनात पिंपरी-चिंचवडच्या पत्रकारांचा बहुमान

पिंपरी : राजस्थानमधील आबू रोड येथे ‘श्रेष्ठ विश्वाच्या निर्मितीसाठी सशक्त मीडिया’ या संकल्पनेवर ब्रह्माकुमारी संस्थेच्या मीडिया व जनसंपर्क प्रभागातर्फे आयोजित राष्ट्रीय मीडिया संमेलनात पिंपरी-चिंचवडमधील पत्रकारांचा विशेष सन्मान करण्यात आला. ९ ते १३ सप्टेंबरदरम्यान झालेल्या या संमेलनात देशातील विविध राज्यांसह फ्रान्स, ऑस्ट्रेलिया आणि नेपाळमधील पत्रकार व मीडिया प्रतिनिधी सहभागी झाले होते.

या संमेलनात महाराष्ट्रातील पत्रकारांचा परिचय करून देताना पिंपरी-चिंचवडमधील पत्रकार महासंघाचे अध्यक्ष संजय मराठे, पिंपरी-चिंचवड पत्रकार महासंघाचे अध्यक्ष रोहित खर्गे, कार्याध्यक्ष दादाराव आढाव, पिंपरी-चिंचवड पत्रकार संघाचे अध्यक्ष प्रविण शिर्के, शबनम सय्यद आणि उमेश पाटील यांना व्यासपीठावर बोलावून सन्मानित करण्यात आले. बीके शांतनुबाई, बीके सरला दीदी आणि बीके निकुंज भाई यांच्या हस्ते छत्रपती शिवाजी महाराजांची प्रतिमा व शाल देऊन हा बहुमान करण्यात आला.

सन्मानानंतर महाराष्ट्रातील पत्रकारांनी उत्स्फूर्तपणे ‘छत्रपती शिवाजी महाराज की जय’ अशा घोषणा देत वातावरणात उत्साह निर्माण केला. या संमेलनात महाराष्ट्रातून मोठ्या संख्येने पत्रकार सहभागी झाले होते. माध्यमे केवळ बातम्या देण्याचे साधन नसून समाजाची विचारसरणी, दृष्टिकोन आणि दिशा प्रभावित करणारी प्रभावी व्यवस्था असल्याचे यावेळी सांगण्यात आले.