डॉ. कुंदाताई भिसे यांच्या पुढाकारातून NCMC कार्ड वितरण उपक्रमाला भरघोस प्रतिसाद

उन्नती सोशल फाउंडेशनच्या अध्यक्षा तथा पिंपरी-चिंचवड महानगरपालिकेच्या नगरसेविका डॉ. सौ. कुंदाताई संजय भिसे यांच्या पुढाकारातून आयोजित करण्यात आलेल्या NCMC (National Common Mobility Card) वितरण उपक्रमाला पिंपळे सौदागर परिसरातील नागरिकांचा उत्स्फूर्त प्रतिसाद लाभला. नागरिकांना आधुनिक, डिजिटल आणि सुलभ वाहतूक सुविधांशी जोडण्याच्या उद्देशाने राबविण्यात आलेला हा उपक्रम यशस्वीरीत्या पार पडला असून आतापर्यंत सुमारे ९५६ कार्डांचे वितरण करण्यात आले आहे.

भारत सरकारच्या “वन नेशन, वन कार्ड” या संकल्पनेअंतर्गत विकसित करण्यात आलेले NCMC कार्ड नागरिकांना मेट्रो, बस, सार्वजनिक वाहतूक, पार्किंग, टोल तसेच विविध डिजिटल व्यवहारांसाठी एकाच कार्डाचा वापर करण्याची सुविधा देते. यामुळे रोख व्यवहारांवरील अवलंबित्व कमी होऊन सुरक्षित, वेगवान आणि सुलभ डिजिटल व्यवहारांना प्रोत्साहन मिळत आहे.

यावेळी बोलताना डॉ. सौ. कुंदाताई संजय भिसे यांनी सांगितले की, पंतप्रधान नरेंद्र मोदी यांच्या नेतृत्वाखाली डिजिटल इंडिया, कॅशलेस व्यवहार आणि आधुनिक नागरिक सेवांना मोठी गती मिळाली आहे. या योजनांचा लाभ प्रत्येक नागरिकापर्यंत पोहोचविणे ही आपली जबाबदारी असून NCMC कार्ड हे डिजिटल भारताच्या संकल्पनेला बळ देणारे प्रभावी माध्यम असल्याचे त्यांनी नमूद केले. भविष्यातही उन्नती सोशल फाउंडेशनच्या माध्यमातून अशाच लोकहिताच्या उपक्रमांचे आयोजन करण्यात येणार असल्याचे त्यांनी स्पष्ट केले.

या कार्यक्रमास ह.भ.प. विजयशेठ पांडुरंग जगताप, जयनाथ काटे, भाजप शहराध्यक्ष तथा नगरसेवक शत्रुघ्न (बापू) काटे, नगरसेविका अनिताताई संदीप काटे, उन्नती सोशल फाउंडेशनचे संस्थापक संजय भिसे, कैलास कुंजीर, शारदाताई मुंडे, गायिका भारती ज्ञायाधीश, रश्मी मोरे तसेच विविध सामाजिक संस्था, ज्येष्ठ नागरिक संघटनांचे प्रतिनिधी आणि परिसरातील नागरिक मोठ्या संख्येने उपस्थित होते. कार्यक्रमाचे सूत्रसंचालन प्रा. प्रेमलाल लांजेवार यांनी केले तर आभार प्रदर्शन संजय भिसे यांनी केले.