नगरसेविका डॉ. कुंदाताई भिसे यांची छत्रपती चौकात पाहणी; वाहतूक कोंडीवर तातडीने उपाययोजनांचे आदेश

पिंपळे सौदागर (प्रतिनिधी): छत्रपती चौक, पिंपळे सौदागर येथे सुरू असलेल्या रस्त्याच्या कामामुळे गेल्या अनेक दिवसांपासून नागरिकांना तीव्र वाहतूक कोंडीचा सामना करावा लागत आहे. विशेषतः जी. के. गुरुकुल शाळा सुटण्याच्या वेळेत तसेच सकाळ, दुपार आणि संध्याकाळच्या गर्दीच्या वेळी वाहनांच्या लांबच लांब रांगा लागत असून अनेक नागरिकांना एक ते दोन तास वाहतूक कोंडीत अडकून राहावे लागत आहे.

या पार्श्वभूमीवर नगरसेविका डॉ. सौ. कुंदाताई संजय भिसे यांनी संबंधित ठिकाणी प्रत्यक्ष भेट देत सुरू असलेल्या रस्त्याच्या कामाची पाहणी केली. यावेळी त्यांनी संबंधित अधिकारी आणि कंत्राटदारांशी चर्चा करून कामाचा आढावा घेत नागरिकांना होणारा त्रास कमी करण्यासाठी तातडीने उपाययोजना करण्याच्या सूचना दिल्या.

रस्त्याचे बहुतांश काम पूर्ण झाले असतानाही किरकोळ कामांसाठी संपूर्ण रस्ता बंद ठेवण्यात आल्याने वाहतूक कोंडी वाढत असल्याचे त्यांनी निदर्शनास आणून दिले. नागरिकांची गैरसोय टाळण्यासाठी किमान एक मार्ग (वन-वे) तातडीने सुरू करण्याचे निर्देश संबंधित अधिकाऱ्यांना देण्यात आले.

तसेच उर्वरित कामाला गती देत येत्या दोन दिवसांत रस्ता पूर्णपणे वाहतुकीसाठी खुला करावा, अशा स्पष्ट सूचना डॉ. भिसे यांनी अधिकाऱ्यांना दिल्या. कामात कोणताही अनावश्यक विलंब होऊ नये, यावरही त्यांनी भर दिला.

यावेळी डॉ. कुंदाताई भिसे यांनी नागरिकांच्या दैनंदिन जीवनाशी संबंधित प्रश्नांना प्राधान्य देत ते तातडीने सोडविण्यासाठी आपण कटिबद्ध असल्याचे सांगितले. पिंपरी-चिंचवड भाजपा शहराध्यक्ष तथा नगरसेवक शत्रुघ्न (बापू) काटे आणि नगरसेविका अनिताताई काटे यांच्या सहकार्याने नागरिकांच्या समस्या प्रभावीपणे मार्गी लावण्यासाठी सातत्याने प्रयत्न सुरू राहतील, असा विश्वास त्यांनी व्यक्त केला.