जिल्हा परिषद शाळेला मैत्री आधार संस्थेचा मदतीचा हात

जिल्हा परिषद शाळेला मैत्री आधार संस्थेचा मदतीचा हात

जांबे (प्रतिनिधी) : सामाजिक बांधिलकी जपत विविध समाजोपयोगी उपक्रम राबविणाऱ्या मैत्री आधार सामाजिक संस्था, पिंपळे निलख यांच्या वतीने शनिवारी (दि. २७ जून २०२६) जांबे येथील जिल्हा परिषद प्राथमिक शाळेला आवश्यक असलेली साऊंड सिस्टीम तसेच अंगणवाडीतील चिमुकल्यांसाठी बिस्किटांचे वाटप करण्यात आले. या उपक्रमासाठी संस्थेने सुमारे २४ हजार रुपयांची मदत केली.

ही संस्था सातत्याने सामाजिक कार्य करत असून, हा उपक्रम संस्थेच्या २९ व्या समाजसेवा उपक्रमाचा भाग ठरला. विद्यार्थ्यांच्या शैक्षणिक व सांस्कृतिक उपक्रमांना चालना मिळावी, तसेच अंगणवाडीतील मुलांमध्ये आनंदाचे वातावरण निर्माण व्हावे, या उद्देशाने ही मदत करण्यात आली.

या कार्यक्रमास संस्थेचे संस्थापक राजेंद्र टकले, अध्यक्ष भरत इंगवले, कार्याध्यक्ष संदीप कामठे, तसेच प्रकाश मुळे, बाळासाहेब धरपळे, पुंडलीक दरेकर, सतीश रानवडे, जयंवत रानवडे, शैलेश शिंदे, राजू गराडे आणि मंगेश पाटील यांच्यासह संस्थेचे पदाधिकारी व सदस्य उपस्थित होते.

यावेळी शाळेचे मुख्याध्यापक नरेंद्र बाळसराफ, उद्योजक भरतशेठ बबनराव गायकवाड, सामाजिक कार्यकर्ते लक्ष्मण बबनराव गायकवाड, जांबे गावातील ग्रामस्थ, शिक्षक आणि विद्यार्थी मोठ्या संख्येने उपस्थित होते. सर्वांच्या हस्ते साहित्याचे वितरण करण्यात आले.

या समाजोपयोगी उपक्रमाबद्दल शाळेचे मुख्याध्यापक, शिक्षक, ग्रामस्थ आणि विद्यार्थ्यांनी मैत्री आधार सामाजिक संस्थेचे आभार मानत समाधान व्यक्त केले. शिक्षण क्षेत्राला बळ देणारे असे उपक्रम भविष्यातही सुरू राहावेत, अशी अपेक्षाही यावेळी व्यक्त करण्यात आली.