डॉ. स्मिता जाधव, कौस्तुभ गावडे यांना राष्ट्रीय श्रमिक आघाडीचा पाठिंब

भाजपच्या दोन्ही उमेदवारांना मतदान करा : यशवंतभाऊ भोसले

स्थानिक उमेदवारांना संधी देण्याचे पदवीधर मतदारांना आवाहन; राष्ट्रीय श्रमिक आघाडीचा जाहीर पाठिंबा

पिंपरी (प्रतिनिधी) : पुणे पदवीधर मतदारसंघातील डॉ. स्मिता योगेश जाधव आणि पुणे विभाग शिक्षक मतदारसंघातील कौस्तुभ मुरलीधर गावडे या भाजपच्या उमेदवारांना पदवीधर व शिक्षक मतदारांनी मतदान करून विजयी करावे, असे आवाहन राष्ट्रीय श्रमिक आघाडीचे अध्यक्ष तथा कामगार नेते यशवंतभाऊ भोसले यांनी केले. संत तुकारामनगर, पिंपरी येथे आयोजित पत्रकार परिषदेत ते बोलत होते.

शिक्षण क्षेत्रातील योगदानाचा दाखला

डॉ. स्मिता योगेश जाधव या डी. वाय. पाटील शिक्षण संस्थेचे संस्थापक तथा शिक्षणमहर्षी पी. डी. पाटील यांच्या कन्या आहेत. त्यांचे बालपण आणि शिक्षण याच परिसरात झाले असून, गेल्या १७ वर्षांपासून त्या शिक्षण क्षेत्राशी संबंधित आहेत. डी. वाय. पाटील शिक्षण संस्थेने पिंपरी-चिंचवडसह देशाच्या शैक्षणिक आणि औद्योगिक विकासात महत्त्वपूर्ण योगदान दिले आहे. या संस्थेतून शिक्षण घेतलेले अनेक विद्यार्थी देश-विदेशांत विविध क्षेत्रांत कार्यरत असल्याचे भोसले यांनी नमूद केले.

शिक्षक मतदारसंघातील उमेदवारालाही पाठिंबा

पुणे विभाग शिक्षक मतदारसंघातील भाजपचे उमेदवार कौस्तुभ मुरलीधर गावडे यांनी एम.कॉम. आणि एमबीएपर्यंत शिक्षण घेतले आहे. ते शिक्षणमहर्षी डॉ. बापूजी साळुंखे यांचे नातू आहेत. शिक्षण क्षेत्राशी संबंधित पार्श्वभूमी असलेल्या दोन्ही उमेदवारांना भाजपने संधी दिली असून, पदवीधर आणि शिक्षक मतदारांनी त्यांना पाठिंबा द्यावा, असे आवाहन भोसले यांनी केले.

राष्ट्रीय श्रमिक आघाडीचा जाहीर पाठिंबा

राज्यभरात भाजपच्या वतीने पदवीधर आणि शिक्षक मतदारसंघांसाठी उमेदवारी देण्यात आलेल्या उमेदवारांना राष्ट्रीय श्रमिक आघाडीच्या वतीने जाहीर पाठिंबा देण्यात येत असल्याची माहिती भोसले यांनी दिली. पुणे पदवीधर मतदारसंघातील पाचही जिल्ह्यांतील मतदारांनी मतदान प्रक्रियेत सक्रिय सहभाग नोंदवून आपल्या पसंतीच्या उमेदवाराला मतदान करावे, असेही त्यांनी सांगितले. पत्रकार परिषदेला नंदू आप्पा कदम, महेंद्र बाविस्कर, मंगेश धाडगे, दिनेश पाटील आदी उपस्थित होते.

कोट :

“शिक्षण क्षेत्राशी संबंधित अनुभव आणि पार्श्वभूमी असलेल्या भाजपच्या दोन्ही उमेदवारांना मतदारांनी संधी द्यावी. पदवीधर व शिक्षक मतदारांनी मतदानात सहभागी होऊन डॉ. स्मिता योगेश जाधव आणि कौस्तुभ मुरलीधर गावडे यांना विजयी करावे. राष्ट्रीय श्रमिक आघाडीचा दोन्ही उमेदवारांना जाहीर पाठिंबा आहे.”

— यशवंतभाऊ भोसले, अध्यक्ष, राष्ट्रीय श्रमिक आघाडी