पिंपळे सौदागरमध्ये भटक्या कुत्र्यांचा वाढता त्रास; तातडीने कारवाईची नगरसेविका अनिताताई काटे यांची मागणी

पिंपळे सौदागरमध्ये भटक्या कुत्र्यांचा वाढता त्रास; तातडीने कारवाईची नगरसेविका अनिताताई काटे यांची मागणी

वारंवार पाठपुरावा करूनही ठोस उपाययोजना नाही; नागरिकांच्या सुरक्षेचा प्रश्न ऐरणीवर

प्रतिनिधी | पिंपळे निलख

पिंपळे सौदागर परिसरातील विश्वशांती कॅालनी ,लिनियर गार्डन , पिंपळे सौदागर गावठाण  भागात भटक्या कुत्र्यांचा वाढता त्रास नागरिकांच्या सुरक्षेचा गंभीर प्रश्न बनत असल्याची तक्रार नगरसेविका अनिताताई संदीप काटे यांनी केली आहे. यासंदर्भात संबंधित विभागाकडे वारंवार लेखी तसेच दूरध्वनीद्वारे पाठपुरावा करूनही अद्याप कोणतीही ठोस कारवाई करण्यात आलेली नसल्याचा आरोप त्यांनी केला आहे.

नगरसेविका काटे यांनी दिलेल्या माहितीनुसार, परिसरात भटक्या कुत्र्यांची संख्या लक्षणीयरीत्या वाढली असून नागरिकांकडून सातत्याने तक्रारी प्राप्त होत आहेत. विशेषतः लहान मुले, शाळकरी विद्यार्थी आणि ज्येष्ठ नागरिक यांच्या सुरक्षेबाबत मोठी चिंता व्यक्त केली जात आहे. काही भागांत कुत्र्यांच्या टोळ्यांमुळे नागरिकांमध्ये भीतीचे वातावरण निर्माण झाले आहे.

या पार्श्वभूमीवर पशुवैद्यकीय विभागातील अधिकारी अरुण दगडे व प्रमोद बाबर यांच्याशी अनेक वेळा संपर्क साधण्याचा प्रयत्न करण्यात आला. मात्र वारंवार फोन करूनही कोणताही प्रतिसाद मिळालेला नसल्याचे नगरसेविका काटे यांनी नमूद केले.

सदर प्रकरणाची गांभीर्याने दखल घेऊन तात्काळ उपाययोजना कराव्यात, संबंधित अधिकाऱ्यांना आवश्यक त्या सूचना द्याव्यात तसेच करण्यात आलेल्या कारवाईबाबत लेखी स्वरूपात माहिती द्यावी, अशी मागणी त्यांनी केली आहे.

नागरिकांच्या सुरक्षेच्या दृष्टीने भटक्या कुत्र्यांवर नियंत्रण मिळवण्यासाठी निर्बीजिकरण, लसीकरण व पुनर्वसनासारख्या उपाययोजना तातडीने राबविण्याची गरज व्यक्त होत आहे. प्रशासनाने या प्रश्नाकडे तातडीने लक्ष देऊन नागरिकांना दिलासा द्यावा, अशी अपेक्षा व्यक्त केली जात आहे.