मुक्या जीवांच्या भुकेसाठी ‘मैत्री आधार’ धाव

श्री संत ज्ञानेश्वर माऊली समाजसेवा चॅरिटेबल ट्रस्टच्या अधिपत्याखालील ताजे (मावळ) येथील श्रद्धा गोसेवा पांजरपोळमधील मुक्या जनावरांसाठी ‘मैत्री आधार सामाजिक संस्था’, पिंपळे निलखच्या वतीने मदतीचा हात देण्यात आला. संस्थेच्या ३१ व्या सामाजिक उपक्रमांतर्गत पांजरपोळमधील ६० गोमातांना तब्बल एक महिना पुरेल एवढा चारा देण्यात आला. या उपक्रमासाठी संस्थेच्या वतीने सुमारे ३० हजार रुपयांची सेवा करण्यात आली.

‘राम कृष्ण हरी’चा जयघोष करत रविवारी (९) हा सामाजिक उपक्रम पार पडला. यावेळी मैत्री आधार सामाजिक संस्थेचे अध्यक्ष राजेंद्र टकले, कार्याध्यक्ष भरत इंगवले, तसेच संदीप कामठे, प्रकाश मुळे, बाळासाहेब धरपळे, पुंडलिक दरेकर, सतीश रानवडे, शैलेश शिंदे, अशोक इंगवले आदी सभासद उपस्थित होते. श्रद्धा गोसेवा पांजरपोळचे विश्वस्त प्रविण केदारी महाराज यांचीही यावेळी उपस्थिती होती.

कोट – भरत इंगवले :
“मुक्या जनावरांची सेवा ही केवळ सामाजिक जबाबदारी नसून माणुसकीची जपणूक आहे. ‘मैत्री आधार’च्या माध्यमातून सातत्याने विविध सामाजिक उपक्रम राबविले जात आहेत. येत्या काळातही गरजू घटकांसाठी तसेच गोसेवेसाठी आणखी भरीव मदत करण्याचा संस्थेचा प्रयत्न राहील.”

कोट – राजेंद्र टकले :
“समाजातील गरजू घटकांना आधार देतानाच मुक्या जीवांची काळजी घेणेही तितकेच महत्त्वाचे आहे. ६० गोमातांच्या महिनाभराच्या चाऱ्याची व्यवस्था करता आली, याचे समाधान आहे. सेवा, सहकार्य आणि माणुसकीचा हा प्रवास ‘मैत्री आधार’च्या माध्यमातून यापुढेही सुरू राहील.”

दरम्यान, एक महिन्याच्या चाऱ्याची व्यवस्था करून मुक्या जनावरांची सेवा केल्याबद्दल श्रद्धा गोसेवा पांजरपोळचे विश्वस्त प्रविण केदारी महाराज यांनी ‘मैत्री आधार’च्या पदाधिकाऱ्यांचे आभार व्यक्त केले. या उपक्रमामुळे पांजरपोळमधील गोमातांच्या चाऱ्याचा प्रश्न काही काळासाठी सुटण्यास मदत झाली असून, सामाजिक बांधिलकी जपणाऱ्या या उपक्रमाचे उपस्थितांनी कौतुक केले.