आपली मुलं’ म्हणून मिळाला आधार; वृद्धाश्रमातील आजी-आजोबांच्या चेहऱ्यावर फुलले समाधान

‘आपली मुलं’ म्हणून मिळाला आधार; वृद्धाश्रमातील आजी-आजोबांच्या चेहऱ्यावर फुलले समाधान

पिंपळे निलख : रक्ताची नाती नसली, तरी माणुसकीची नाती जपली तर आयुष्याच्या संध्याकाळीही आधार मिळतो, याचा प्रत्यय मावळ तालुक्यातील आढले येथील वृद्धाश्रमात आला. गेल्या दोन वर्षांपासून सातत्याने विविध समाजोपयोगी उपक्रम राबविणाऱ्या मैत्री आधार सामाजिक संस्था, पिंपळे निलख यांच्या वतीने वृद्धाश्रमातील आजी-आजोबांसाठी आवश्यक साहित्य व अन्नधान्याची मदत करण्यात आली.

संस्थेच्या वतीने राबविण्यात आलेली ही ३२ वी समाजसेवा ॲक्टिव्हिटी होती. आढले येथील कै. बंडू दामू बोडके यांच्या नावाने असलेल्या वृंदावन फाऊंडेशन संचलित वृद्धाश्रमातील १० आजी-आजोबांसाठी पिठाची गिरणी तसेच एक महिन्याचे रेशनिंग देण्यात आले. या मदतीसाठी संस्थेने तब्बल २६ हजार रुपयांचा खर्च केला.

वृद्धाश्रमातील आजी-आजोबांना पिठाची गिरणी आणि महिनाभराचे रेशन मिळाल्याने त्यांच्या चेहऱ्यावर आनंद स्पष्टपणे दिसून आला. मदत स्वीकारताना त्यांच्या बोलण्यातून व्यक्त झालेली भावना उपस्थितांच्या मनाला स्पर्शून गेली.

“समाजात अशी मदत करणारी माणसं आहेत, हीच आमची मुलं आहेत,” अशी भावना त्यांनी व्यक्त केली. या शब्दांनी उपस्थित संस्थेच्या सदस्यांचेही डोळे पाणावले.

“वृद्धाश्रमातील आजी-आजोबांना मदत करताना आम्ही केवळ गरजेच्या वस्तू देत नाही, तर त्यांना आपलेपणाची जाणीव करून देण्याचा प्रयत्न करतो. त्यांच्या चेहऱ्यावरचा आनंद आणि समाधान हेच आमच्यासाठी सर्वात मोठे समाधान आहे. समाजातील गरजू घटकांसाठी मैत्री आधार सामाजिक संस्था यापुढेही सातत्याने काम करत राहील,” असे कार्याध्यक्ष भरत इंगवले यांनी सांगितले.

आजच्या धावपळीच्या जीवनात वृद्धत्वाकडे दुर्लक्ष होत असताना, मैत्री आधार सामाजिक संस्थेने या आजी-आजोबांच्या गरजा ओळखून केलेली मदत केवळ वस्तूंचे वाटप न राहता माणुसकीचा आधार देणारी ठरली. समाजातील गरजू घटकांना मदत करण्याचा संस्थेचा हा उपक्रम भविष्यातही सुरू ठेवण्याचा निर्धार यावेळी व्यक्त करण्यात आला.

या समाजसेवा उपक्रमासाठी संस्थेचे अध्यक्ष राजेंद्र टकले, कार्याध्यक्ष भरत इंगवले तसेच सन्माननीय सभासद संदीप लक्ष्मण कामठे, अनिल आत्माराम केदारी, सतीश रानवडे, जयवंत रानवडे, बाळासाहेब धरपळे, शैलेश शिंदे, प्रकाश मुळे, संदीप बबनराव साठे आणि राजू गराडे उपस्थित होते.

दरम्यान, वृद्धाश्रमाचे मालक संदीप बंडू बोडके यांनी मैत्री आधार सामाजिक संस्थेच्या सर्व सदस्यांचे मनापासून आभार मानले.

मदतीची किंमत पैशांत नसते; ती गरजूच्या चेहऱ्यावर उमटलेल्या समाधानात असते. मैत्री आधार सामाजिक संस्थेच्या या उपक्रमातून याच माणुसकीचा प्रत्यय पुन्हा एकदा आला.