तक्रारी करूनही पोलिसांकडून ठोस कारवाई नाही; नगरसेविका अनिताताई काटे यांचा आरोप

तक्रारी करूनही पोलिसांकडून ठोस कारवाई नाही; नगरसेविका अनिताताई काटे यांचा आरोप

चॅलेंजर पब्लिक स्कूलमधील कथित आर्थिक अफरातफर व गैरव्यवहाराच्या प्रकरणात निष्पक्ष चौकशीची मागणी

पिंपळे सौदागर, दि. ३१ ऑगस्ट २०२६ : चॅलेंजर पब्लिक स्कूलमधील कथित आर्थिक अफरातफर, आर्थिक गैरव्यवहार आणि निधीच्या गैरवापराबाबत वारंवार तक्रारी करूनही पोलिसांकडून ठोस कारवाई होत नसल्याचा आरोप चॅलेंजर पब्लिक स्कूलच्या संचालिका तथा नगरसेविका सौ. अनिताताई संदीप काटे यांनी केला आहे. संबंधित प्रकरणाची निष्पक्ष आणि सखोल चौकशी करून उपलब्ध पुरावे व कागदपत्रांच्या आधारे दोषींवर कारवाई करावी, अशी मागणी त्यांनी केली आहे.

अनिताताई काटे यांच्या माहितीनुसार, १९ ऑगस्ट २०२६ रोजी न्यू सांगवी पोलीस ठाण्याच्या पोलीस निरीक्षकांकडे निवेदन देण्यात आले आहे. सुधीर निंगडे हे पूर्वी संस्थेत कार्यरत असताना त्यांच्या कार्यकाळातील आर्थिक व्यवहारात कथित अफरातफर, आर्थिक गैरव्यवहार तसेच निधीच्या गैरवापराबाबत आरोप करण्यात आले आहेत. या प्रकरणाबाबत आवश्यक कागदपत्रांसह यापूर्वीही तक्रारी करण्यात आल्याचे त्यांनी सांगितले. संबंधित पोलीस अधिकारी व कर्मचाऱ्यांशी संपर्क साधून तक्रारीचा वारंवार पाठपुरावा करण्यात आल्याचा दावाही त्यांनी केला आहे.

पोलिसांकडून अपेक्षित प्रगती होत नसल्याने आता हे प्रकरण वरिष्ठ पातळीवर नेण्याचा निर्णय घेतल्याचे काटे यांनी स्पष्ट केले. यापूर्वीच्या तक्रारीवर नेमकी कोणती कारवाई झाली, याची लेखी माहिती द्यावी तसेच कारवाई झाली नसल्यास त्यामागील कारणांची चौकशी करावी, अशी मागणी करण्यात आली आहे. तसेच वरिष्ठ पोलीस अधिकाऱ्यांविरोधात आणि संपूर्ण प्रकरणाची तात्काळ दखल घेण्यासाठी राज्याचे मुख्यमंत्री व गृहमंत्री यांना लवकरच निवेदन देणार असल्याचे त्यांनी सांगितले.

“तक्रारीनंतरही निष्पक्ष आणि सखोल चौकशी होत नसल्याने आम्हाला वरिष्ठ पोलीस निरीक्षकांकडून सापत्नभावाची वागणूक मिळत असल्याची भावना निर्माण झाली आहे. उपलब्ध पुरावे व कागदपत्रांच्या आधारे दोषींवर कारवाई व्हावी, एवढीच आमची मागणी आहे. याबाबत सांगवी पोलिसांकडून ठोस कार्यवाही होत नाही. त्यामुळे संपूर्ण प्रकरणाची तात्काळ दखल घेऊन योग्य ती कारवाई करावी, यासाठी आम्ही राज्याचे मुख्यमंत्री आणि गृहमंत्री यांना लवकरच निवेदन देणार आहोत.”
— सौ. अनिताताई संदीप काटे