पंडित सुधाकर चव्हाण यांच्या गुरुपूजन सोहळ्याला रसिकांची उत्स्फूर्त दाद

पंडित सुधाकर चव्हाण यांच्या गुरुपूजन सोहळ्याला रसिकांची उत्स्फूर्त दाद

यमन व मधुकंस रागातील बंदिशींनी रंगली मैफल; स्वरश्री संगीत फाउंडेशनतर्फे वाकड येथे आयोजन

पिंपरी, प्रतिनिधी : स्वरश्री संगीत फाउंडेशनतर्फे अखिल भारतीय गांधर्व महाविद्यालयाचे सचिव व प्रसिद्ध शास्त्रीय गायक पंडित सुधाकर चव्हाण यांच्या गुरुपूजनाचे आयोजन म्हातोबा मंदिर सभागृह, वाकड येथे करण्यात आले. रसिकांचा उत्स्फूर्त प्रतिसाद लाभलेल्या या कार्यक्रमाची सुरुवात नगरसेविका श्रुतीताई वाकडकर, रेश्माताई भुजबळ, पखवाजवादक ह.भ.प. तुकाराम भुमकर, कीर्तनकार ह.भ.प. लहू महाराज जमदाडे आणि गायक नामदेव शिंदे यांच्या हस्ते झाली. पहिल्या सत्रात स्वरश्री संगीत विद्यालयाच्या विद्यार्थ्यांनी विविध रागांतील बंदिशी व छोटेख्याल सादर केले.

पहिल्या सत्राचा समारोप नामदेव शिंदे यांच्या गायनाने झाला. त्यांनी विलंबित एकतालातील शुद्ध सारंग रागानंतर ‘अधिक देखणे तरी निरंजन पाहणे’ हे भजन सादर केले. दुसऱ्या सत्रात विद्यार्थ्यांचे गायन आणि विक्रम शिंदे यांच्या शिष्यांचे तबलावादन झाले. हार्मोनियम, तबला, पखवाज, टाळ व तानपुऱ्याची साथ लाभली. निवेदन हेमंत पुणेकर आणि आकाश थिटे यांनी केले.

कार्यक्रमाचे मुख्य आकर्षण पंडित सुधाकर चव्हाण यांचे शास्त्रीय गायन ठरले. त्यांनी यमन रागातील विलंबित एकतालातील ‘काहे सखी…’ व ‘श्याम बजाये आज मुरलिया’ या बंदिशी, तसेच शिवानंद स्वामी यांनी रचलेली मधुकंस रागातील ‘बनरा रे संग आजा…’ ही बंदिश सादर केली. त्यांच्या सुरेल आणि प्रगल्भ गायनाला रसिकांनी उत्स्फूर्त दाद दिली. हार्मोनियमवर गंगाधर शिंदे, तबल्यावर पंडित दत्तात्रय भावे, पखवाजवर गंभीर महाराज अवचार, टाळावर मकरंद बादरायणी, गायन साथसंगतीला शिवानंद स्वामी आणि तानपुऱ्यावर अभयसिंह वाघचौरे व विवेक गवळी यांनी साथ दिली.