बांधकाम मजुरांच्या मुलांच्या यशाला कौतुकाची थाप!

बांधकाम मजुरांच्या मुलांच्या यशाला कौतुकाची थाप!

बीएआयतर्फे गुणवंत विद्यार्थ्यांचा सन्मान; शिक्षणातून प्रगती साधण्याचे सहायक कामगार आयुक्तांचे आवाहन

हिंजवडी, ता. १० : आई-वडील बांधकामाच्या ठिकाणी कष्टाची पराकाष्ठा करीत असताना प्रतिकूल परिस्थितीवर मात करून शिक्षणात उल्लेखनीय यश मिळविणाऱ्या बांधकाम कामगारांच्या गुणवंत मुलांचा बिल्डर्स असोसिएशन ऑफ इंडिया (बीएआय), पुणे केंद्रातर्फे सन्मान करण्यात आला. विद्यार्थ्यांच्या मेहनतीचे कौतुक करण्यासोबतच त्यांना पुढील शिक्षणासाठी प्रोत्साहन देण्याच्या उद्देशाने या विशेष सोहळ्याचे आयोजन करण्यात आले होते.

बांधकामाच्या ठिकाणी विटा, वाळू आणि सिमेंटच्या धुळीत कष्ट करणारे आई-वडील आणि त्याच परिस्थितीत अभ्यास करून उज्ज्वल यश मिळविणारी त्यांची मुले, हे चित्र अनेकदा पाहायला मिळते. अशा विद्यार्थ्यांच्या जिद्दीला प्रोत्साहन देत त्यांच्या यशाची दखल घेण्याचा उपक्रम बीएआयतर्फे राबविण्यात आला.

या वेळी सहायक कामगार आयुक्त दत्तात्रय पवार, अजयश्री सोशल फाऊंडेशनचे संचालक अजयकुमार लोळगे, बीएआय पुणे केंद्राचे अध्यक्ष अजय गुजर, उपाध्यक्ष राजाराम हजारे, सचिव महेश राठी, कोषाध्यक्ष सुशील अग्रवाल उपस्थित होते. संस्थेचे माजी राष्ट्रीय उपाध्यक्ष रणजीत मोरे, महाराष्ट्र प्रदेशाचे माजी अध्यक्ष जगन्नाथ जाधव, सुनील मते, पुणे कंत्राटदार संघटनेचे अध्यक्ष रविंद्र भोसले, रयत शिक्षण संस्थेच्या पुणे विभागाच्या सदस्य तथा निसर्ग ऋण फाऊंडेशनच्या अध्यक्ष अर्चना सोनावणे आदी मान्यवर उपस्थित होते.

शिक्षणातूनच प्रगतीचा मार्ग

बांधकाम कामगारांच्या मुलांना उच्च शिक्षण घेता यावे, त्यांच्या शैक्षणिक प्रगतीला प्रोत्साहन मिळावे आणि कामगार कुटुंबांना आर्थिक आधार मिळावा, यासाठी महाराष्ट्र शासनाच्या इमारत व इतर बांधकाम कामगार कल्याणकारी मंडळामार्फत विविध योजना राबविण्यात येतात. पात्र कामगारांनी मंडळाकडे नोंदणी करून तिचे वेळोवेळी नूतनीकरण करावे आणि योजनांचा लाभ घ्यावा, असे आवाहन सहायक कामगार आयुक्त दत्तात्रय पवार यांनी केले.

शैक्षणिक मदतीसोबतच मातृत्व लाभ, सामाजिक सुरक्षा आणि निवृत्तीवेतनाशी संबंधित योजनांची माहितीही त्यांनी दिली. कामगारांच्या मुलांना चांगले शिक्षण मिळाल्यास त्यांच्या कुटुंबाच्या सामाजिक आणि आर्थिक प्रगतीला हातभार लागेल. विद्यार्थ्यांनी कष्टाची जाणीव ठेवून शिक्षणाला प्राधान्य द्यावे, असे मार्गदर्शनही त्यांनी केले.

शिक्षणासोबत कौशल्यविकासावर भर द्यावा

बांधकाम क्षेत्रातील संस्थांनी विद्यार्थ्यांना केवळ सन्मानापुरते मर्यादित न ठेवता त्यांना मार्गदर्शन, शैक्षणिक सहकार्य आणि इंटर्नशिपच्या संधी उपलब्ध करून द्याव्यात, अशी अपेक्षा अजयकुमार लोळगे यांनी व्यक्त केली. शिक्षणातून मिळणारे ज्ञान, कौशल्य आणि अनुभव समाजाच्या उपयोगी आणण्याची भावना विद्यार्थ्यांनी जोपासावी. प्रत्यक्ष कामाचा अनुभव आणि कौशल्यविकासामुळे विद्यार्थ्यांच्या करिअरला योग्य दिशा मिळू शकते, असेही त्यांनी नमूद केले.

बीएआय पुणे केंद्राचे अध्यक्ष अजय गुजर यांनी प्रास्ताविकात शिक्षणाचे महत्त्व अधोरेखित केले. बांधकाम कामगार आणि त्यांच्या मुलांच्या कल्याणासाठी संस्था विविध उपक्रम राबवीत असल्याचे त्यांनी सांगितले. विद्यार्थ्यांनी परिस्थितीची मर्यादा न मानता मोठी स्वप्ने पाहावीत आणि ती पूर्ण करण्यासाठी सातत्याने मेहनत घ्यावी, असे आवाहन त्यांनी केले.

संस्थेचे उपाध्यक्ष व कार्यक्रम समन्वयक राजाराम हजारे आणि ‘अभियंता मित्र’ मासिकाचे संपादक डॉ. कमलकांत वडेलकर यांनीही मनोगत व्यक्त केले.

कोट

“बांधकाम कामगारांच्या मुलांना उच्च शिक्षणासाठी प्रोत्साहन देणे आणि त्यांच्या कुटुंबांना आर्थिक आधार मिळवून देणे महत्त्वाचे आहे. पात्र कामगारांनी शासनाच्या कल्याणकारी योजनांसाठी नोंदणी करून त्यांचा लाभ घ्यावा. आयुष्यात यश मिळविण्यासाठी कष्ट आणि शिक्षण यांना पर्याय नाही.”

— दत्तात्रय पवार, सहायक कामगार आयुक्त