प्रभाग ३६ मध्ये ‘मोफत योजनांच्या’ नावाखाली मतदारांना प्रलोभन; लोकशाहीला धोका असल्याचा आरोप

प्रभाग ३६ मध्ये ‘मोफत योजनांच्या’ नावाखाली मतदारांना प्रलोभन; लोकशाहीला धोका असल्याचा आरोप

 

पुणे : पुणे महानगरपालिका निवडणुका डोळ्यांसमोर ठेवून प्रभाग क्रमांक ३६ – पद्मावती सहकारनगर परिसरात इच्छुक व आजी-माजी उमेदवारांकडून मोफत सहल, मोफत देवदर्शन, मोफत कपडे वाटप, मोफत लकी ड्रॉ अशा योजनांच्या माध्यमातून मतदारांना प्रलोभन दाखवले जात असल्याचे गंभीर आरोप समोर आले आहेत. या प्रकारामुळे लोकशाही प्रक्रियेलाच धोका निर्माण होत असल्याची भावना नागरिकांत व्यक्त केली जात आहे.

स्थानिक नागरिकांच्या म्हणण्यानुसार, या तथाकथित योजनांचा लाभ फक्त प्रभागातील मतदार कार्डधारकांनाच दिला जात असून, मतदार कार्ड नसलेल्या भाडेकरूंना किंवा इतर नागरिकांना स्पष्टपणे नो एन्ट्री केली जात आहे. यासाठी मतदान कार्ड व फोटो मागितले जात असल्याने, ही मदत नसून नियोजित भुरळ घालण्याचा प्रकार असल्याचा आरोप होत आहे.

विशेषतः दलित वस्तीमध्ये या योजनांचा जास्त कल दिसून येत असून, अशिक्षित व असुरक्षित मतदारांना लक्ष्य करून ‘मोफत’ आमिष दाखवून विकासापासून दूर ठेवण्याचा प्रयत्न केला जात असल्याची टीका नागरिकांनी केली आहे. समाजहिताच्या नावाखाली राजकीय स्वार्थ साधला जात असल्याने, निवडणुकीतील नैतिकता व समान संधीचा प्रश्न ऐरणीवर आला आहे.

या पार्श्वभूमीवर नागरिकांनी जागरूक राहून मोफतच्या आमिषाला बळी न पडता लोकशाही मजबूत करण्याचे आवाहन करण्यात येत आहे. योग्य उमेदवाराची निवड हीच दीर्घकालीन विकासाची गुरुकिल्ली असल्याचे मत व्यक्त होत आहे. तसेच डॉ. बाबासाहेब आंबेडकर यांनी दिलेल्या लोकशाही मूल्यांचा सन्मान राखत, संघर्ष व विचार वाया जाऊ देऊ नयेत, असेही नागरिकांचे म्हणणे आहे.

नागरिकांचे स्पष्ट मत आहे की, “आपण लोकशाहीतील राजे आहोत. मोफत योजनांच्या नावाखाली मतदानावर परिणाम करण्याचा कोणताही प्रयत्न नाकारला पाहिजे. चांगल्या भविष्यासाठी विवेकाने निर्णय घ्यावा.”