मदतीचा हात, माणुसकीची साथ; मैत्री आधार संस्थेचे उल्लेखनीय कार्य

पिंपळे निलख : सामाजिक बांधिलकी जपत गरजूंसाठी सातत्याने मदतीचा हात देणाऱ्या मैत्री आधार सामाजिक संस्था, पिंपळे निलख यांनी गेल्या दोन वर्षांत विविध सामाजिक उपक्रमांद्वारे समाजात सेवाभावाचे वेगळे उदाहरण निर्माण केले आहे. गरजू महिला, अनाथ बालके, ज्येष्ठ नागरिक आणि आर्थिकदृष्ट्या दुर्बल कुटुंबांना मदत करून संस्थेने समाजातील वंचित घटकांच्या आयुष्यात आशेचा किरण निर्माण करण्याचे काम केले आहे. संस्थेने आतापर्यंत ३० सामाजिक उपक्रम यशस्वीपणे राबविले आहेत.

संस्थेच्या वतीने आदिनाथ कॉलनी, काळेवाडी येथील होतकरू व गरजू महिला सौ. शारदा अनिल वाघमारे यांना स्वावलंबनासाठी उषा कंपनीचे शिलाई मशीन भेट देण्यात आले. या माध्यमातून त्यांच्या रोजगाराला चालना मिळावी आणि त्या स्वतःच्या पायावर उभ्या राहाव्यात, हा संस्थेचा उद्देश होता. तसेच रविवारी (दि. १२ जुलै) थेरगाव येथील स्पंदन बाल आश्रमातील ३० अनाथ बालकांना सुमारे २० हजार रुपयांचे रेशन साहित्य देऊन संस्थेने सामाजिक उत्तरदायित्वाची जाणीव जपली. या मदतीमुळे बालकांच्या दैनंदिन गरजा पूर्ण करण्यासाठी हातभार लागला.

मैत्री आधार सामाजिक संस्थेचे कार्य केवळ आर्थिक मदतीपुरते मर्यादित नसून समाजात स्वावलंबन, सेवाभाव आणि सामाजिक संवेदनशीलता वाढविण्याचे आहे. संस्थेच्या प्रत्येक उपक्रमाला नागरिकांचा उत्स्फूर्त प्रतिसाद मिळत असून, भविष्यातही अधिकाधिक गरजूंपर्यंत मदतीचा हात पोहोचविण्याचा संस्थेचा निर्धार आहे.

या विविध उपक्रमांमध्ये संस्थेचे राजेंद्र टकले, सचिनभाऊ बडगे, शैलेश शिंदे, सतीश रानवडे, अशोक इंगवले, संदीप ब. साठे, प्रकाश मुळे, बाळासाहेब धरपळे, पुंडलिक दरेकर, संदीप ल. कामठे, अनिल केदारी, शोभाताई शिंदे, नूतनताई मोकाशी, भरत इंगवले, सुरेश पाटील आणि गणेश भिसे यांनी सक्रिय सहभाग घेतला. समाजातील गरजू घटकांसाठी सातत्याने कार्य करणाऱ्या अशा संस्थांमुळे समाजात सेवाभाव, परस्पर सहकार्य आणि सामाजिक ऐक्य अधिक बळकट होत असल्याची भावना यावेळी व्यक्त करण्यात आली.