वाकडवासीयांच्या सेवेसाठी ‘आरोग्य मंदिर’ सज्ज; कावेरी नगर येथे लोकार्पण संपन्न

वाकडवासीयांच्या सेवेसाठी ‘आरोग्य मंदिर’ सज्ज; कावेरी नगर येथे लोकार्पण संपन्न

पिंपरी-चिंचवड : प्रतिनिधी

वाकड परिसरातील नागरिकांना सुलभ व दर्जेदार आरोग्य सेवा उपलब्ध करून देण्याच्या उद्देशाने पिंपरी-चिंचवड महानगरपालिकेच्या वतीने कावेरी नगर, वाकड भाजी मंडई येथे नव्याने सुरू करण्यात आलेल्या ‘नागरी आयुष्यमान आरोग्य मंदिरा’चे लोकार्पण उत्साहात पार पडले.

या उद्घाटन सोहळ्यास नगरसेविका आरती चौंधे यांच्या उपस्थितीत विविध मान्यवरांची उपस्थिती लाभली. कार्यक्रमास ज्येष्ठ वैद्यकीय अधिकारी डॉ. शंकर मुसळगी (नवीन थेरगाव रुग्णालय), नोडल वैद्यकीय अधिकारी डॉ. तुषार जाधव (NTH) तसेच कावेरी नगर दवाखान्याच्या वैद्यकीय अधिकारी डॉ. प्रसन्ना भोसलेंची प्रमुख उपस्थिती होती. परिसरातील ज्येष्ठ नागरिक व मान्यवरांनीही कार्यक्रमाला हजेरी लावली.

उद्घाटनानंतर आरोग्य केंद्राची पाहणी करण्यात आली. केंद्रातील आधुनिक सुविधा, स्वच्छतेचा दर्जा आणि रुग्णसेवेचे नियोजन पाहून उपस्थितांनी समाधान व्यक्त केले. या केंद्रामार्फत सर्वसामान्य नागरिकांना त्यांच्या हक्काची, दर्जेदार व सुलभ आरोग्य सेवा घराजवळच उपलब्ध होणार आहे.

या उपक्रमाचा मुख्य उद्देश नागरिकांपर्यंत आरोग्य सेवा अधिक प्रभावीपणे पोहोचवणे हा असून, डॉक्टर व आरोग्य कर्मचाऱ्यांशी संवाद साधून त्यांच्या कामाचा आढावा देखील घेण्यात आला. सर्वांच्या सामूहिक प्रयत्नातून हे केंद्र नागरिकांच्या विश्वासाचे आणि उत्तम आरोग्य सेवेचे प्रतीक ठरेल, असा विश्वास व्यक्त करण्यात आला.