हिंजवडी समस्यांवर फास्टट्रॅक लेबर कोर्ट, लिफ्ट सुरक्षा, पिंपरीचा आकृतीबंध – अधिवेशनात गाजवणार : आमदार शंकर जगताप

हिंजवडी समस्यांवर फास्टट्रॅक लेबर कोर्ट, लिफ्ट सुरक्षा, पिंपरीचा आकृतीबंध – अधिवेशनात गाजवणार : आमदार शंकर जगताप

“अवजड वाहनांमुळे होणारे अपघात रोखण्यासाठी पिंपरी चिंचवडमध्ये सेफ्टी ऑडिटची मागणी” — आमदार जगताप

हिवाळी अधिवेशनात लक्षवेधी व 48 तारांकित प्रश्नांद्वारे शासनाचे लक्ष वेधणार

“अधिवेशन कालावधी कमी असला तरी शहराचे सर्व प्रश्न ठामपणे मांडणार” — आमदार जगताप

पिंपरी, ५ डिसेंबर (प्रतिनिधी) :

राज्याच्या नागपूर हिवाळी अधिवेशनात पिंपरी चिंचवड शहरातील औद्योगिक दुर्घटना, वाहतूक सुरक्षितता आणि नागरिकांशी निगडित विविध तातडीच्या प्रश्नांवर सभागृहाचे लक्ष वेधण्याचा मानस असल्याचे आमदार शंकर जगताप यांनी सांगितले. शहरातील विविध कंपन्यांत वाढत जाणाऱ्या दुर्घटनांच्या पार्श्वभूमीवर सेफ्टी ऑडिट अनिवार्य करण्याची मागणी ते लक्षवेधी सूचनांद्वारे करणार आहेत.

हिंजवडीमधील आयटी कर्मचाऱ्यांच्या वाढत्या समस्यांसाठी फास्टट्रॅक लेबर कोर्ट स्थापन करणे, अप्रशिक्षित वाहनचालकांमुळे होणारे अपघात रोखण्यासाठी सक्षम प्रशिक्षण प्रणाली निर्माण करणे, उद्योगनगरातील अघोषित भार नियमावरील उपाययोजना, पवना नदी सुधार प्रकल्पासाठी तातडीचा निधी — या मुद्द्यांसह राज्यातील एकूण 48 तारांकित प्रश्न आमदार जगताप सभागृहात उपस्थित करणार आहेत.

राज्याचे हिवाळी अधिवेशन 8 ते 14 डिसेंबरदरम्यान होणार असून, “अधिवेशनाचा कालावधी कमी असला तरी पिंपरी चिंचवडमधील प्रत्येक महत्त्वाचा विषय ठामपणे मांडणार”, असे जगताप यांनी स्पष्ट केले.

लक्षवेधी सूचनांमधून उपस्थित होणारे मुद्दे

• औद्योगिक क्षेत्रातील दुर्घटनांच्या पार्श्वभूमीवर सेफ्टी ऑडिट करण्याची मागणी
• अप्रशिक्षित वाहनचालकांसाठी सक्षम प्रशिक्षण प्रणाली
• उद्योगनगरातील अघोषित भार नियमांवर उपाययोजना
• हिंजवडीतील आयटीयन्ससाठी फास्टट्रॅक लेबर कोर्ट
• पीएमआरडी लिलावातील भूखंड विक्रीला स्थगिती
• काळेवाडी–बिजलिनगर महावितरण कार्यालयांचे विभाजन
• मागास विद्यार्थ्यांसाठी महाज्योतीकडील 126 कोटींच्या प्रलंबित शिष्यवृत्तीची तातडीची मंजुरी
• पिंपरीतील कोट्यवधी रुपये खर्चाचे सीसीटीव्ही कॅमेरे बंद — याकडे गंभीर दखल
• पिंपरी चिंचवडच्या प्रारूप विकास आराखड्यातील गंभीर चुका — आराखडा रद्द करण्याची मागणी
• काळेवाडी–रहाटणीतील देशी दारू दुकानाचा परवाना रद्द करण्याची मागणी

तारांकित प्रश्नांमधील प्रमुख मुद्दे

• सर्व गृहनिर्माण सोसायट्यांमध्ये लिफ्ट सुरक्षा नियमांची काटेकोर अंमलबजावणी
• ई-वाहनांवरील टोलमाफी आदेशाचे उल्लंघन करणाऱ्या ठेकेदारांवर कारवाई
• रुबी हॉल किडनी रोपण रॅकेट चौकशीतील दोषींवर कृती
• केवायसी प्रलंबित अर्जांमुळे नागरिकांना भोगाव्या लागणाऱ्या गैरसोयी
• औंध जिल्हा रुग्णालयातील एमआरआय सेवा बंद — तातडीची सुरुवात
• कुपोषित बालकांच्या आहार पुरवठ्याची चौकशी
• मनपातील 4776 रिक्त जागा भरण्यासाठी सुधारित आकृतीबंध मंजुरी
• नवीन टीओडी वीजमीटरसंदर्भातील तक्रारी
• अप्पर तहसीलदार कार्यालयातील दिरंगाई
• वाकड–हिंजवडीतील खटले पिंपरी न्यायालयात वर्ग करणे
• मनपाच्या रुग्णालयांत कॅशलेस सुविधा उपलब्ध करणे
• राज्यातील प्राध्यापकांची 12,000 पदे तातडीने भरणे
• सांगवी रुग्णालयातील फॉरेन्सिक डॉक्टर नेमणूक
• उद्यान विभागातील 157 कोटींच्या निविदेची त्रयस्थ संस्थेमार्फत चौकशी
• पिंपरीतील अवजड वाहनांमुळे होणारे अपघात टाळण्यासाठी सुरक्षा ऑडिट
• प्राधिकरणाच्या आरक्षित जागांवरील दीर्घकालीन ताबेदारांना सातबारा व प्रॉपर्टी कार्ड वितरित करणे