पिंपरीत देशातील पहिली SUMS कार्यशाळा; ‘डिजिटल वाहन युगाची’ भोसरीत शक्तीशाली सुरुवात!

पिंपरीत देशातील पहिली SUMS कार्यशाळा; ‘डिजिटल वाहन युगाची’ भोसरीत शक्तीशाली सुरुवात!

पिंपरी/पुणे — कनेक्टेड, बुद्धिमान आणि अत्याधुनिक वाहनतंत्रज्ञानाच्या नव्या पर्वाला दिशा देणारा देशातील पहिलाच सॉफ्टवेअर अपडेट मॅनेजमेंट सिस्टीम (SUMS) कार्यशाळा सेंट्रल इन्स्टिट्यूट ऑफ रोड ट्रान्सपोर्ट (CIRT), भोसरी येथे मोठ्या उत्साहात पार पडली. CIRT आणि ऑटोसिफू प्रा. लि. यांच्या संयुक्त विद्यमाने आयोजित या कार्यशाळेने ऑटोमोबाईल क्षेत्रातील ‘डिजिटल सिक्युरिटी’ आणि ‘स्मार्ट व्हेईकल गव्हर्नन्स’ या दोन महत्त्वाच्या घटकांना एकत्र आणणारे ऐतिहासिक पाऊल टाकले.

उद्घाटन रस्ते वाहतूक व महामार्ग मंत्रालयाचे (MoRTH) सल्लागार के. सी. शर्मा यांच्या आभासी संदेशाने झाले. त्यांनी सांगितले,

“भविष्यातील वाहनं म्हणजे चाके असलेले संगणक! सुरक्षित सॉफ्टवेअर व्यवस्थापन ही ऑटो उद्योगाची सर्वात मोठी प्राथमिक गरज आहे.”

ऑटोसिफूचे ऑपरेशन्स प्रमुख विक्रम पगारे यांनी आधुनिक वाहने ‘डिजिटल प्लॅटफॉर्म’मध्ये रुपांतरित होत असल्याचे नमूद केले. AIS-190 / UN R156 मानकांची अंमलबजावणी करताना SUMS का अनिवार्य ठरणार आहे याचे त्यांनी प्रभावी विश्लेषण केले.

कार्यशाळेतील मुख्य सत्रात CIRT चे संचालक डॉ. देवेंद्र सिंग यांनी SUMS, CSMS आणि ISO 21434 या नव्या सायबरसुरक्षा मानकांसाठी CIRT ची व्यापक रणनीती सादर केली.

CIRT चे ऑटोमोटिव्ह सायबरसुरक्षा प्रमुख फारुख मखदूम यांनी उद्योगातील अनुपालन वाढवण्यासाठी संस्था राबवणार असलेल्या पुढील उपक्रमांचे रोडमॅप सादर केले.

कार्यक्रमातील सर्वात चर्चेत राहिलेला सत्र म्हणजे सायबर डिफेन्स संचालक वैशाख सुरेश यांनी घेतलेला SUMS मास्टरक्लास.

जटिल तांत्रिक संकल्पनांची त्यांनी केलेली सोपी, समजण्यासारखी मांडणी पाहून उपस्थित प्रतिनिधींनी पाठ थोपटली. अनेक तज्ज्ञांनी हे सत्र “भारतातील वाहन उद्योगाला नव्या तांत्रिक दिशेची देणगी” असे संबोधले.

या कार्यशाळेमुळे भारतामध्ये स्मार्ट, सुरक्षित आणि नियमनबद्ध ऑटोमोबाईल सॉफ्टवेअर इकोसिस्टमची पायाभरणी अधिक भक्कम झाली असे तज्ज्ञांचे मत आहे.

भोसरीतला हा उपक्रम ऑटो उद्योगाच्या भविष्याचा नवा रोडमॅप म्हणून पाहिला जात आहे.