पिंपरी-चिंचवड : अज्ञात वाहनाची दुचाकीला धडक; अतुल पवार यांच्या तत्परतेने जखमीला जीवदान

पिंपरी-चिंचवड : अज्ञात वाहनाची दुचाकीला धडक; अतुल पवार यांच्या तत्परतेने जखमीला जीवदान

पिंपरी-चिंचवडमधील जगताप डेअरी चौक ते सांगवी फाटा बीआरटी रोडवरील जगताप डेअरी फ्लायओव्हरवर भरधाव अज्ञात वाहनाने एका दुचाकीस्वाराला पाठीमागून जोरदार धडक देत पसार झाल्याची घटना घडली. या अपघातात मारुती कुंभार हे दुचाकीस्वार जखमी झाले.

घटना फ्लायओव्हरवर घडल्याने जखमी मारुती कुंभार काही काळ रस्त्यावरच पडून होते. यावेळी बाजूच्या सर्व्हिस रोडने पिंपळे गुरव कडे जात असलेले अतुल पवार यांच्या नजरेस हा अपघातग्रस्त दुचाकीस्वार पडला. त्यांनी तात्काळ आपली गाडी थांबवून जखमी व्यक्तीची विचारपूस केली.

मारुती कुंभार यांनी त्यांना घडलेली संपूर्ण घटना सांगितली तसेच अनेक वाहने जात असूनही कोणीही मदतीसाठी थांबत नसल्याची खंत व्यक्त केली. परिस्थितीची गंभीरता ओळखून आध्या सोशल फाउंडेशन महाराष्ट्र राज्य चे संस्थापक /अध्यक्ष अतुल पवार यांनी वेळ न दवडता त्यांना आपल्या गाडीतून औंध रुग्णालयात दाखल केले. तेथे त्यांच्यावर तातडीने प्रथमोपचार करण्यात आले आणि पुढील तपासणीसाठी सिटी स्कॅन करण्यात आला.

याचदरम्यान अतुल पवार यांनी मारुती कुंभार यांच्या नातेवाईकांशी संपर्क साधून घटनेची माहिती दिली. नातेवाईक रुग्णालयात येईपर्यंत ते स्वतः तेथे थांबले आणि सर्व वैद्यकीय अहवाल त्यांच्या ताब्यात दिले. पुढील मदत लागल्यास नक्की कळवा असेही त्यांनी सांगितले.

वाहतूक पोलीस संतोष खैरे यांनी सांगितले की, “अपघातानंतर जखमींना तात्काळ मदत करणे अत्यंत महत्त्वाचे आहे. नागरिकांनी भीती न बाळगता ‘गुड समारिटन’ नियमांनुसार जखमींना रुग्णालयात पोहोचवावे. अशा वेळी मदत करणाऱ्या नागरिकांचे पोलिसांकडूनही कौतुक केले जाते.”

दरम्यान, अपघातानंतर जखमींना तातडीने मदत करणे ही प्रत्येक नागरिकाची जबाबदारी असल्याचे आवाहन अतुल पवार यांनीही केले. त्यांच्या या मानवतेच्या कृतीचे परिसरात सर्वत्र कौतुक होत आहे.