मराठी पत्रकार संघाची पिंपरी-चिंचवड शहर व जिल्हा कार्यकारिणी जाहीर

मराठी पत्रकार संघ, पिंपरी-चिंचवड शहर व जिल्हा कार्यकारिणीच्या नूतन पदाधिकाऱ्यांचा पदग्रहण व नियुक्तीपत्र प्रदान समारंभ पिंपरी-चिंचवड महानगरपालिका पत्रकार कक्षात उत्साहात पार पडला. उपमहापौर शर्मिला बाबर, सत्तारूढ पक्षनेते प्रशांत शितोळे, मराठी पत्रकार संघाचे प्रदेशाध्यक्ष किरण जोशी, प्रदेश उपाध्यक्ष विवेक इनामदार, प्रदेश संघटक अरुण कांबळे आणि पुणे जिल्हाध्यक्ष संजय मराठे यांच्या हस्ते नवनिर्वाचित पदाधिकाऱ्यांचा सन्मान करण्यात आला. यावेळी नगरसेवक उत्तम केंदळे यांच्यासह विविध माध्यमांचे पत्रकार उपस्थित होते.

“पत्रकारिता ही लोकशाहीचा महत्त्वाचा आधारस्तंभ असून नागरिकांच्या भावना, समस्या आणि अपेक्षा प्रशासनापर्यंत पोहोचविण्याचे महत्त्वाचे काम पत्रकार करतात. पत्रकारांनी सकारात्मक, निष्पक्ष आणि वस्तुनिष्ठ पत्रकारितेच्या माध्यमातून जनहिताचे प्रश्न सातत्याने मांडावेत. नागरिक आणि प्रशासन यांच्यातील संवाद अधिक प्रभावी करण्यासाठी पत्रकारांची भूमिका महत्त्वाची आहे,” असे प्रतिपादन उपमहापौर शर्मिला बाबर यांनी केले.

यावेळी मराठी पत्रकार संघाची पिंपरी-चिंचवड शहर कार्यकारिणी जाहीर करण्यात आली. प्रदेशाध्यक्ष किरण जोशी यांच्या हस्ते नवनिर्वाचित पदाधिकाऱ्यांना नियुक्तीपत्र प्रदान करण्यात आले. शहराध्यक्ष रोहित खर्गे, महिला पुणे जिल्हाध्यक्षा मनीषा थोरात पिसाळ, शहर महिला अध्यक्षा अर्चना मेंगडे, कार्याध्यक्ष दादाराव आढाव, उपाध्यक्ष गणेश मोरे, सचिव बजरंग मासाळ, खजिनदार संतोष जाधव, संपर्कप्रमुख संदीप सोनार, नागेश खजूर्गीकर, बलभीम भोसले, उमेश सनस, सीताराम मोरे, उमेश यादव, संतलाल यादव, श्रीधर जगताप आणि अजय कुलकर्णी यांची विविध पदांवर नियुक्ती करण्यात आली.

“पत्रकार संघटना ही केवळ पत्रकारांच्या हक्कांसाठी काम करणारी संस्था नसून समाजातील प्रश्नांना व्यासपीठ देण्याचे माध्यम आहे. नवनिर्वाचित पदाधिकाऱ्यांनी संघटनेची ताकद वाढविताना पत्रकारांच्या अडचणी सोडविण्यासाठी आणि समाजहिताचे प्रश्न प्रभावीपणे मांडण्यासाठी एकजुटीने काम करावे. पिंपरी-चिंचवडमधील पत्रकारितेला संघटित आणि सक्षम करण्यासाठी मराठी पत्रकार संघ सदैव प्रयत्नशील राहील,” असे प्रदेशाध्यक्ष किरण जोशी यांनी सांगितले.

“पत्रकारांनी शहराच्या विकासकामांवर लक्ष ठेवतानाच नागरिकांच्या मूलभूत प्रश्नांना वाचा फोडण्याचे काम सातत्याने करावे. प्रशासनाच्या चांगल्या कामांची माहिती जनतेपर्यंत पोहोचविण्यासोबतच त्रुटींवरही निर्भीडपणे भाष्य होणे आवश्यक आहे. नूतन कार्यकारिणीच्या माध्यमातून पत्रकारांच्या प्रश्नांना योग्य व्यासपीठ मिळेल,” असे सत्तारूढ पक्षनेते प्रशांत शितोळे यांनी सांगितले. कार्यक्रमाचे प्रास्ताविक अरुण कांबळे यांनी केले. सूत्रसंचालन विवेक इनामदार यांनी केले, तर आभार रोहित खर्गे यांनी मानले. कार्यक्रमास मराठी पत्रकार संघाचे पदाधिकारी, सदस्य, विविध माध्यमांचे पत्रकार व मान्यवर मोठ्या संख्येने उपस्थित होते.