स्वरनिनादातून महिला शक्तीचा गौरव” : उन्नति सोशल फाऊंडेशनतर्फे जागतिक महिला दिन उत्साहात साजरा

स्वरनिनादातून महिला शक्तीचा गौरव” : उन्नति सोशल फाऊंडेशनतर्फे जागतिक महिला दिन उत्साहात साजरा

पिंपळे सौदागर (ता. ०९) :

जागतिक महिला दिनानिमित्त उन्नति सोशल फाऊंडेशनतर्फे आयोजित करण्यात आलेल्या “स्वरनिनाद” या विशेष सांस्कृतिक कार्यक्रमात संगीताची सुरेल मैफल आणि कर्तृत्ववान महिलांचा सन्मान यामुळे वातावरण उत्साहपूर्ण झाले. मराठी-हिंदी भक्तीगीत, भावगीत आणि चित्रपटगीतांच्या सुरेल सादरीकरणाने कार्यक्रमाला रंगत आणली, तर विविध क्षेत्रात उल्लेखनीय कार्य करणाऱ्या २१ महिलांचा सन्मान करून त्यांच्या कर्तृत्वाला सलाम करण्यात आला.

उन्नति सोशल फाऊंडेशनच्या पिंपळे सौदागर येथील कार्यालयात पार पडलेल्या या कार्यक्रमाला सामाजिक, सांस्कृतिक तसेच ज्येष्ठ नागरिक संघटनांचा उत्स्फूर्त प्रतिसाद लाभला. गायिका भारती न्यायाधीश यांनी सादर केलेल्या भक्तीगीत, भावगीत आणि चित्रपटगीतांनी उपस्थित रसिकांना अक्षरशः मंत्रमुग्ध केले. निवेदिका वसुधा गोडसे यांनी ओघवत्या शैलीत सूत्रसंचालन करत कार्यक्रमाला अधिक रंगतदार बनवले.

कार्यक्रमामागील संकल्पना स्पष्ट करताना उन्नति सोशल फाऊंडेशनच्या अध्यक्षा व पिंपरी-चिंचवड महानगरपालिकेच्या नगरसेविका डॉ. सौ. कुंदाताई संजय भिसे म्हणाल्या, “आज महिलांनी शिक्षण, उद्योग, समाजकार्य, कला-साहित्य अशा विविध क्षेत्रात उल्लेखनीय कामगिरी करत स्वतःची स्वतंत्र ओळख निर्माण केली आहे. अशा कर्तृत्ववान महिलांचा सन्मान करून त्यांचे कार्य समाजासमोर आणणे आणि इतर महिलांना प्रेरणा देणे हा या उपक्रमामागील मुख्य उद्देश आहे. महिला सशक्तीकरणासाठी समाजातील सर्व घटकांनी एकत्र येणे आवश्यक आहे.”

समाजसेविका शारदाताई मुंडे यांनीही आपल्या मनोगतात सांगितले की, “महिला सन्मानाचे कार्यक्रम हे केवळ औपचारिकता नसून समाजाच्या प्रगतीसाठी प्रेरणादायी पाऊल असते. अनेक महिला शांतपणे आणि निस्वार्थपणे समाजासाठी कार्य करत असतात. त्यांच्या कार्याचा गौरव झाल्यास त्यांना प्रोत्साहन मिळते आणि इतर महिलांनाही समाजकार्यात पुढे येण्याची प्रेरणा मिळते.”

हा कार्यक्रम उन्नति सोशल फाऊंडेशनचे संस्थापक संजय तात्याबा भिसे यांच्या मार्गदर्शनाखाली पार पडला. यावेळी समाजसेविका शारदाताई मुंडे, सपनाताई शत्रुघ्न (बापू) काटे, नगरसेविका अनिताताई संदीप काटे, डॉ. कुंदाताई संजय भिसे, पिंपरी-चिंचवड कल्चरल फाउंडेशनचे संस्थापक अध्यक्ष विजय भिसे, उन्नती सखीच्या उपाध्यक्षा रश्मी मोरे यांच्यासह आनंद हास्य क्लब, ऑल सीनियर सिटीझन असोसिएशन, लिनियर गार्डन ज्येष्ठ नागरिक संघ, विठाई वाचनालय आणि नवचैतन्य हास्य क्लबचे सदस्य मोठ्या संख्येने उपस्थित होते.

स्वर, सन्मान आणि प्रेरणा यांचा सुंदर संगम घडवत “स्वरनिनाद” कार्यक्रमाने महिला शक्तीला सलाम करत जागतिक महिला दिनाचा उत्सव अविस्मरणीय केला.