कोइमतुरमध्ये धक्कादायक प्रकार; शाळकरी मुलाला जळत्या कचराकुंडीत ढकलल्याची घटना

कोइमतुरमध्ये धक्कादायक प्रकार; शाळकरी मुलाला जळत्या कचराकुंडीत ढकलल्याची घटना

कोइमतुर, प्रतिनिधी :

कोइमतुर येथे दोन शाळकरी मुलांनी चेष्टेच्या नावाखाली आपल्या वर्गमित्राला जळत्या कचराकुंडीत ढकलल्याची धक्कादायक घटना घडली. या घटनेत संबंधित मुलगा जखमी झाला असून, एका वर्गमित्राने प्रसंगावधान राखत त्याला तातडीने नजीकच्या रुग्णालयात दाखल केले.

वर्गातील काही विद्यार्थ्यांच्या म्हणण्यानुसार, ही घटना जातीवरून झालेल्या वादातून घडल्याचा आरोप करण्यात येत आहे. मात्र, स्थानिक पोलिसांकडून मिळालेल्या प्राथमिक माहितीनुसार हा प्रकार खेळाखेळात घडल्याचे सांगण्यात आले आहे.

जखमी मुलावर रुग्णालयात उपचार सुरू असून त्याची प्रकृती स्थिर असल्याचे समजते. घटनेची माहिती मिळताच पोलिसांनी घटनास्थळी भेट देऊन चौकशी सुरू केली आहे. शाळा प्रशासनाकडूनही अंतर्गत चौकशी करण्यात येत असून, नेमकी कारणे तपासली जात आहेत.

या घटनेमुळे परिसरात खळबळ उडाली असून, शाळांमधील सुरक्षिततेचा प्रश्न पुन्हा ऐरणीवर आला आहे.