संविधान लोककला शाहिरी जलसा’मध्ये भीमगीतांचा दणदणाट; पुणेकर मंत्रमुग्ध

संविधान दिनानिमित्त झळकला लोकशाहीचा जलवा!

‘संविधान लोककला शाहिरी जलसा’मध्ये भीमगीतांचा दणदणाट; पुणेकर मंत्रमुग्ध

पुणे : प्रतिनिधी

“होता भीमराव म्हणून माय तुझ्या बोटाला लागली शाई…”, “माझ्या भिमाने घटनेला हिऱ्या-मोत्यांनी सजवलं…”, “जगातली देखणी बाई मी भीमाची लेखणी…” अशा थरारक, अंगावर काटा आणणाऱ्या शाहीरीने संविधान दिनाचा उत्सव पुण्यात अक्षरशः रंगून गेला. डॉ. बाबासाहेब आंबेडकर सांस्कृतिक महोत्सव समितीच्या वतीने आयोजित ‘संविधान लोककला शाहिरी जलसा’ हा कार्यक्रम पुणेकरांसाठी लोककला, संस्कृती आणि संविधान मूल्यांचा अविस्मरणीय सोहळा ठरला.

“माझे संविधान – माझा अभिमान” या उपक्रमांतर्गत झालेल्या या जलशात शाहीर शीतल साठे, सचिन माळी, सदाशिव निकम, पृथ्वीराज माळी आदी नामवंत कलाकारांनी धमाकेदार शाहिरी सादर केली.

कार्यक्रमाची सुरुवात संविधानाच्या उद्देशिकेच्या सामूहिक वाचनाने झाली. त्यानंतर ‘भीमराया वंदाया कवन शाहिरी…’ या दणदणीत गीताने जलशाला उर्जा मिळाली. शिवरायांच्या पराक्रमाची आठवण करून देणारे पोवाडे, राजर्षी शाहू महाराज–महात्मा फुले यांच्या सामाजिक कार्यावर आधारित बहारदार लोकगीतांमुळे सभागृहात उत्साहाला उधाण आले.

 

यानंतर ‘कुणी नाही केलं माय माझ्या भिमाने केलं’, ‘देश उभा केला संविधानाने’, ‘चांदण्याची छाया माझा भीमराया’ यांसारख्या लोकप्रिय गीतांनी प्रेक्षकांना अक्षरशः मंत्रमुग्ध केले.

कार्यक्रमाला सावित्रीबाई फुले पुणे विद्यापीठाचे प्र-कुलगुरू डॉ. पराग काळकर, रिपाइं (A) युवक प्रदेशाध्यक्ष पप्पू कागदे, शहराध्यक्ष संजय सोनवणे, समिती अध्यक्ष परशुराम वाडेकर, रिपाइं युवक आघाडी प्रमुख शैलेंद्र चव्हाण, तसेच सुनीता वाडेकर, अशोक शिरोळे, डॉ. विजय खरे, सरिता वाडेकर, अविनाश कदम आदी मान्यवरांची उपस्थिती होती.

समितीचे अध्यक्ष परशुराम वाडेकर यांनी संविधानातील मूलभूत मूल्यांची जनजागृती व लोकशाही प्रक्रियेबद्दल जागरूकता निर्माण करणे हा जलशाचा मुख्य उद्देश असल्याचे सांगितले.

कार्यक्रमात एक अनोखा, हृदयस्पर्शी क्षणही पाहायला मिळाला—कचरा वेचताना सापडलेली दहा लाखांची बॅग मूळ मालकास परत करणाऱ्या अत्यंत प्रामाणिक सफाईकामगार अंजू माने यांचा सन्मान करण्यात आला. त्यांना पाच हजार रुपये देऊन गौरविण्यात आले, तेव्हा उपस्थित प्रेक्षकांनी टाळ्यांचा कडकडाट केला.

कार्यक्रमाचा समारोप राष्ट्रगीताने झाला. सूत्रसंचालन अॅड. ज्ञानेश्वर जाविर यांनी केले.

संविधान, संस्कृती आणि लोककला— या तिन्हींची एकत्रित सांगड घालत ‘संविधान लोककला शाहिरी जलसा’ पुणेकरांच्या मनावर कायमची छाप सोडून गेला!