पिंपरी-चिंचवडमध्ये ‘सहकार संवाद’ : सात हजार सोसायटींच्या समस्या सोडवण्यासाठी फेडरेशनची पुढाकारपूर्ण मोहीम

पिंपरी-चिंचवडमध्ये ‘सहकार संवाद’ : सात हजार सोसायटींच्या समस्या सोडवण्यासाठी फेडरेशनची पुढाकारपूर्ण मोहीम

पिंपरी-चिंचवड | प्रतिनिधी

पिंपरी-चिंचवड शहरातील सोसायट्या चालविताना उद्भवणाऱ्या गुंतागुंतीच्या प्रश्‍नांना तोडगा शोधण्यासाठी पिंपरी-चिंचवड हाऊसिंग सोसायटी फेडरेशनकडून महत्त्वपूर्ण पाऊल उचलण्यात आले आहे. शहरातील तब्बल सात हजार सहकारी गृहनिर्माण संस्थांच्या हितासाठी रविवारी, 30 नोव्हेंबर रोजी “सहकार संवाद कार्यक्रम” आयोजित करण्यात आला असून, सोसायटीधारक आणि कमिटी सदस्यांसाठी हा कार्यक्रम मोठी संधी मानली जात आहे.

सोसायटी व्यवस्थापनात वारंवार उद्भवणारे प्रश्‍न —

वार्षिक सर्वसाधारण सभा, ताळेबंद सादरीकरण, देखभाल खर्च वसुली, सदस्यत्व, कन्व्हेन्स डिड, शेअर सर्टिफिकेट, निवडणुका इत्यादी प्रक्रिया — अनेकांच्या अज्ञानामुळे गोंधळात अडकतात. सहकारी गृहरचना अधिनियम 1960, 1961 आणि उपविधींची अपुरी माहिती हीच सर्वात मोठी अडचण असल्याचे फेडरेशनचे अध्यक्ष संजीवन सांगळे यांनी सांगितले.

या समस्यांवर प्रकाश टाकण्यासाठी सहकारी क्षेत्रातील नामांकित तज्ज्ञ व्यासपीठावर मार्गदर्शन करणार आहेत.

कार्यक्रमात उपस्थित राहणार —

• मा. श्री. मुकुंद पवार, सहाय्यक उपनिबंधक (पुणे-6)

• श्री. थिटे, सहाय्यक उपनिबंधक

• ॲड. अजित बोराटे, कायदेविषयक सल्लागार

• सीए संजय काटे, प्रमाणित लेखापरीक्षक

• प्रमुख पाहुणे : ज्ञानेश्वर भंडारे, उपसंपादक, लोकमत

या कार्यक्रमात आदर्श उपविधी, ऑडिट, कर नियम, थकबाकी वसुली, सदस्य व पदाधिकाऱ्यांची कर्तव्ये अशा महत्त्वाच्या मुद्द्यांवर थेट मार्गदर्शन मिळणार आहे.

फेडरेशनचे अध्यक्ष संजीवन सांगळे म्हणाले —

“पिंपरी-चिंचवडमधील सात हजार सोसायट्यांमधील अनेक कमिटी सदस्यांना अधिनियम आणि उपविधींचे ज्ञान कमी असल्याने अनावश्यक वाद निर्माण होतात आणि प्रकरणे कोर्टापर्यंत जातात. ‘सहकार संवाद’ हा कार्यक्रम म्हणजे अशा सर्व समस्या दूर करण्यासाठी प्रभावी मार्गदर्शनाचं व्यासपीठ आहे. शहरातील प्रत्येक सोसायटीने याचा नक्की लाभ घ्यावा.”

सोसायटीधारकांच्या हक्कांसाठी आयोजित हा “सहकार संवाद” कार्यक्रम शहरातील सहकारी क्षेत्राला दिशा देणारा ठरेल, असा विश्वास व्यक्त केला जात आहे.