आमदार महेश लांडगे यांच्या संकल्पनेतून उपक्रमाला मिळतोय जागतिक दर्जाचा प्रतिसाद

आमदार महेश लांडगे यांच्या संकल्पनेतून उपक्रमाला मिळतोय जागतिक दर्जाचा प्रतिसाद

‘रिव्हर सायक्लोथॉन 2025’साठी २५ हजार सायकलपटूंची नोंदणी पूर्ण!

पिंपरी-चिंचवड । प्रतिनिधी

इंद्रायणी नदी स्वच्छता आणि पर्यावरण संवर्धनाचा दमदार संदेश देणाऱ्या ‘रिव्हर सायक्लोथॉन 2025’ या उपक्रमाला पुणे–पिंपरी-चिंचवडकरांनी दिलेला उत्स्फूर्त प्रतिसाद पाहता यंदाची सायक्लोथॉन जागतिक स्तरावरील उपक्रम म्हणून उभा राहत असल्याचे स्पष्ट झाले आहे. आमदार महेश लांडगे यांच्या संकल्पनेतून सुरू झालेल्या या उपक्रमासाठी आजपर्यंत २५ हजारांहून अधिक सायकलपटूंची नोंदणी पूर्ण झाली आहे.

हा उपक्रम २३ नोव्हेंबर रोजी सकाळी ६ वाजता, डुडूळगाव–मोशी येथील ‘स्टॅच्यू ऑफ हिंदुभूषण’ आंतरराष्ट्रीय औद्योगिक प्रदर्शन केंद्रावरून सुरू होणार आहे. कार्यक्रमास अवघे पाच दिवस शिल्लक असताना नोंदणीचा वेग वाढत असून, यंदा ३५ हजारांपेक्षा अधिक सहभाग मिळेल, असा आयोजकांचा अंदाज आहे.

गतवर्षी या सायक्लोथॉनची ‘जगातील सर्वात लांब सायकल रांग’ म्हणून ‘गिनिज बुक ऑफ वर्ल्ड रेकॉर्ड’मध्ये नोंद झाली होती. यंदाही नवा विश्वविक्रम रचण्याच्या दिशेने या उपक्रमाची घोडदौड सुरू आहे.

मोशीतील नव्या ठिकाणी उत्कृष्ट सुविधा

दरवर्षी भोसरीत होणारा सायक्लोथॉन यंदा पहिल्यांदाच मोशीतील नव्या, प्रशस्त आणि सुव्यवस्थित ठिकाणी आयोजित करण्यात आला आहे. पुणे–नाशिक महामार्गालगतचे हे ठिकाण मोठ्या सहभागासाठी अत्यंत सोयीचे ठरले असून, पार्किंग, सुरक्षा व वाहतूक व्यवस्थेची काटेकोर तयारी करण्यात आली आहे.

पर्यावरण व आरोग्याचा संदेश

या उपक्रमाचे संयुक्त आयोजन पिंपरी-चिंचवड महानगरपालिका, अविरत श्रमदान, सायकल मित्र, WTE फाउंडेशन आणि महेशदादा स्पोर्ट्स फाउंडेशन यांच्या वतीने होत आहे. पर्यावरण संवर्धन, आरोग्यवर्धन आणि इंद्रायणी नदी स्वच्छतेचा संदेश समाजात रुजवणे हा या उपक्रमामागील प्रमुख उद्देश आहे.

अधिकृत प्रतिक्रिया

“रिव्हर सायक्लोथॉनमध्ये २५ हजार सायकलपटूंनी दिलेला प्रतिसाद प्रेरणादायी आहे. येणारे पाच दिवस अत्यंत महत्त्वाचे आहेत. अधिकाधिक नागरिकांनी सहभागी व्हावे आणि पर्यावरण संवर्धनाचा संदेश जगापर्यंत पोहोचवावा. मोशीतील नव्या ठिकाणी सर्व सुविधा, सुरक्षा आणि पार्किंगची उत्तम व्यवस्था केलेली आहे.

चला—इंद्रायणी नदीसाठी, पर्यावरणासाठी आणि पुढील पिढ्यांसाठी एकत्र येऊ आणि नवा इतिहास घडवूया.”

— डॉ. निलेश लोंढे, मुख्य समन्वयक, रिव्हर सायक्लोथॉन 2025