प्रवीण काकडे यांना “महाराजा यशवंतराव होळकर” राज्यस्तरीय समाजसेवा पुरस्कार जाहीर

मा. श्री. प्रवीण काकडे (रा. धोंडेवाडी, ता. कराड, जि. सातारा) यांना “महाराजा यशवंतराव होळकर समाजसेवा राज्यस्तरीय पुरस्कार” जाहीर झाला आहे. ऑल इंडिया धनगर समाज महासंघाचे महाराष्ट्र प्रदेशाध्यक्ष तसेच अहिल्यादेवी सामाजिक व शैक्षणिक विकास ट्रस्ट, कराडचे अध्यक्ष म्हणून ते कार्यरत आहेत. सामाजिक व शैक्षणिक क्षेत्रातील त्यांच्या उल्लेखनीय योगदानाची दखल घेऊन आदिवासी धनगर साहित्य संमेलन, महाराष्ट्र राज्य यांच्या वतीने हा सन्मान जाहीर करण्यात आला आहे.

या पुरस्काराचे वितरण ११ व १२ एप्रिल रोजी नाशिक जिल्ह्यातील चांदवड येथे अहिल्यादेवी होळकर वाडा येथे आयोजित सोहळ्यात होणार आहे. या कार्यक्रमाला प्रा. रामशिंदे (सभापती, विधान परिषद), माजी आमदार रामहरी रुपनवर, श्रीमंत अमरजीत राजे जहागीरदार, खासदार रामराव वडकुते, माजी आमदार गोपीचंद पडळकर, डॉ. प्रकाश महानवर (कुलगुरू, सोलापूर विद्यापीठ), डॉ. अभिमन्यू टकले तसेच इतर मान्यवर उपस्थित राहणार आहेत.

प्रवीण काकडे यांनी गेल्या अनेक वर्षांपासून सामाजिक व शैक्षणिक क्षेत्रात सातत्याने कार्य केले आहे. विशेषतः कोरोना काळात त्यांनी डोंगर-दऱ्यांतील दुर्गम भागात जाऊन विद्यार्थ्यांना शैक्षणिक साहित्य वाटप केले. रत्नागिरी, सिंधुदुर्ग, रायगड, सातारा, कोल्हापूर आणि सांगली या जिल्ह्यांतील हजारो विद्यार्थ्यांना त्यांनी प्रत्यक्ष वाडी-वस्त्यांवर जाऊन मदत केली, ज्यामुळे अनेक विद्यार्थ्यांना शिक्षणाच्या प्रवाहात टिकून राहता आले.

अहिल्यादेवी सामाजिक व शैक्षणिक विकास ट्रस्टच्या माध्यमातून त्यांनी ५,००० हून अधिक विद्यार्थ्यांना शैक्षणिक साहित्य व आर्थिक मदत केली आहे. गुणवंत विद्यार्थ्यांचा सत्कार, महिलांसाठी मोठे पुरस्कार सोहळे आणि विविध सामाजिक उपक्रम त्यांनी राबवले आहेत. त्यांच्या कार्याची दखल घेत यापूर्वीही त्यांना समाजरत्न पुरस्कार (२०१९), राष्ट्रीय जीवनगौरव पुरस्कार (२०२३) आणि महाराष्ट्र रत्न पुरस्कार देऊन सन्मानित करण्यात आले आहे. त्यांच्या या कार्यामुळे महाराष्ट्रासह गोवा आणि कर्नाटकातील धनगर समाजात आनंदाचे वातावरण निर्माण झाले आहे.