वेदांच्या अध्ययनातून समाजपरिवर्तन शक्य — लोकसभा अध्यक्ष ओम बिर्ला

वेदांच्या अध्ययनातून समाजपरिवर्तन शक्य — लोकसभा अध्यक्ष ओम बिर्ला 

पुणे, ३० नोव्हेंबर २०२५:

आळंदी–मोशी येथील वेदश्री तपोवनात सुरु असलेल्या गीता जयंती महोत्सवाच्या दुसऱ्या दिवशी आध्यात्म, संस्कृती आणि वेदपरंपरेचा अद्भुत संगम पाहायला मिळाला. कांची कामकोटी पीठाचे जगद्गुरू शंकराचार्य अनंतश्री विजयेंद्र सरस्वती महाराज आणि देशाचे लोकसभा अध्यक्ष ओम बिर्ला यांची प्रमुख उपस्थिती लाभली. पुण्याचे सुप्रसिद्ध उद्योजक व महर्षि वेदव्यास प्रतिष्ठानचे ट्रस्टी श्री अभय भुतडा हे या भव्य सोहळ्याचे यजमान आहेत.

पारंपरिक सत्कार आणि सांस्कृतिक वैभव

कार्यक्रमाच्या सुरुवातीला यजमान श्री अभय भुतडा यांनी लोकसभा अध्यक्ष ओम बिर्ला यांचा पेशवाई पगडी आणि श्रीगणेश मूर्ती देऊन सन्मान केला. वातावरण संस्कृत मंत्रोच्चारांनी पवित्र झालं आणि संपूर्ण परिसरात अध्यात्मिक स्पंदने जाणवू लागली.

 

महर्षि वेदव्यास पुरस्कार प्रदान

यावेळी लोकसभा अध्यक्ष ओम बिर्ला यांनी राजस्थान पत्रिका चे मुख्य संपादक गुलाबचंद कोठारी यांना महर्षि वेदव्यास पुरस्कार प्रदान केला.

स्वामी गोविंद देव गिरि महाराज (कोषाध्यक्ष – श्रीराम जन्मभूमि न्यास, अयोध्या) यांचीही मान्यवर उपस्थिती लाभली.

 

ओम बिर्ला यांचे प्रेरणादायी विचार

“शंकराचार्य आणि गोविंद देव गिरि महाराज यांच्या सान्निध्यात काही क्षण घालवणे ही माझ्यासाठी परम भाग्याची गोष्ट आहे,” असे सांगत त्यांनी उपस्थितांचे मन जिंकले.

ते पुढे म्हणाले –

• “स्वामी गोविंद गिरी महाराज प्रतिष्ठानमार्फत वैदिक शिक्षणाचा जो प्रसार करत आहेत, तो संपूर्ण देशासाठी प्रेरणादायी आहे.”
• “वेदविद्येच्या माध्यमातून समाजात परिवर्तन घडवणं शक्य आहे.”
• “पुरस्कारार्थी गुलाब कोठारी यांनी वेद, संस्कृती आणि पत्रकारितेचा अनोखा संगम साधत नवे आदर्श निर्माण केले आहेत.”

 

शंकराचार्य विजयेंद्र सरस्वती महाराजांचे मार्गदर्शन

शंकराचार्य महाराज म्हणाले—

“आर्थिक प्रगतीसोबत धार्मिक आणि सांस्कृतिक जतन अत्यावश्यक आहे. वेदश्री प्रतिष्ठान हे कार्य निष्ठेने करत असून गीता जयंती महोत्सव हा त्याच सेवाभावाचा उत्तम नमुना आहे.

लोकसभा अध्यक्ष ओम बिर्ला लोकशाहीच्या मंदिराचे पवित्र्य जपत देशाची सेवा करत आहेत.”

 

कीर्तनाने दिवसाची सुंदर सांगता

सायंकाळी ह.भ.प. डॉ. मकरंदबुवा रामदासी यांच्या प्रभावी कीर्तनसेवेने दुसऱ्या दिवसाचा कार्यक्रम भक्तीभावात संपन्न झाला.

 

उद्याचा भव्य सांगता सोहळा

२९ नोव्हेंबर ते १ डिसेंबर या कालावधीत वेदश्री तपोवन येथे भव्य गीता जयंती महोत्सव सुरू असून, उद्या वैदिक परंपरेचा दिव्य संगम असलेला भव्य सांगता समारंभ संपन्न होणार आहे.