आता मुलाला काय खायला घालू?” — वाकडमधील माउलीची हाक

 

वाकड प्रतिनिधी | मुंजोबा नगर

वाकड परिसरातील मुंजोबा नगर येथे शॉर्ट सर्किटमुळे लागलेल्या भीषण आगीत एका महिलेचा संसार पूर्णतः जळून खाक झाला. सुदैवाने या आगीत श्रीमती सुमन राठोड आणि त्यांच्या एकुलत्या एक मुलाचा जीव थोडक्यात बचावला; मात्र घरातील पै-पैसा, भांडी-कुंडी, धान्य, अंथरूण-पांघरूण असे सर्व साहित्य भस्मसात झाले.

आगीतून जीव वाचला, पण उदरनिर्वाहाचे सर्व साधन जळून गेल्याने श्रीमती राठोड यांच्यावर अक्षरशः आभाळ कोसळले आहे. “आता मुलाला काय खायला घालू?” असा केविलवाणा प्रश्न त्या विचारत आहेत. रोजंदारीवर काम करून संसार चालवणाऱ्या या माउलीसमोर अचानक उभा राहिलेला हा प्रसंग अत्यंत हृदयद्रावक आहे.

घटनेची माहिती मिळताच मैत्री आधार सामाजिक संस्था, पिंपळे निलख यांच्या वतीने तत्काळ मदतीचा हात पुढे करण्यात आला. संस्थेने श्रीमती सुमन राठोड यांना रुपये १०,०००/- ची आर्थिक मदत देत त्यांच्या संसाराला आधार दिला. संस्थेच्या या सामाजिक उपक्रमाचे परिसरातून कौतुक होत आहे.

स्थानिक नागरिकांनीही प्रशासनाने अशा आपत्तीग्रस्त कुटुंबांना तातडीची मदत व पुनर्वसन द्यावे, अशी मागणी केली आहे. शॉर्ट सर्किटमुळे वाढणाऱ्या आगीच्या घटनांच्या पार्श्वभूमीवर घरगुती विद्युत यंत्रणांची नियमित तपासणी करण्याचे आवाहन करण्यात येत आहे.

या घटनेमुळे पुन्हा एकदा सिद्ध झाले की, संकटाच्या काळात सामाजिक संस्था आणि संवेदनशील नागरिक हेच खरे आधारस्तंभ ठरतात.