मैत्री आधार सामाजिक संस्थेचा २४ वा समाजसेवेचा उपक्रम : येलवाडी येथील दिव्यांग अनाथ आश्रमाला मोलाची मदत

मैत्री आधार सामाजिक संस्थेचा २४ वा समाजसेवेचा उपक्रम : येलवाडी येथील दिव्यांग अनाथ आश्रमाला मोलाची मदत

पिंपळे निलख | प्रतिनिधी

दिनांक १८ जानेवारी २०२६ रोजी मैत्री आधार सामाजिक संस्था, पिंपळे निलख यांच्या सौजन्याने समाजसेवेचा २४ वा उपक्रम अत्यंत प्रेरणादायी पद्धतीने राबविण्यात आला. या उपक्रमांतर्गत येलवाडी, देहू येथील वात्सल्य दिव्यांग अनाथ आश्रमातील ४२ मुलांना मदतीचा हात देण्यात आला.

संस्थेच्या वतीने आश्रमाच्या दैनंदिन गरजा लक्षात घेऊन ८ लिटरचा कुकर – १, फिलिप्स कंपनीचा मिक्सर – १, एलईडी दिवे – १० नग तसेच एक महिना पुरेल इतके रेशन देण्यात आले. या सर्व साहित्याची एकूण किंमत सुमारे २२,००० रुपये इतकी असून, गरजू मुलांच्या जीवनात दिलासा देणारी ही मदत ठरली आहे.

या समाजोपयोगी उपक्रमाला मैत्री आधार सामाजिक संस्थेचे कार्याध्यक्ष भरत इंगवले, संस्थापक राजेंद्र टकले, युनियन बँकेचे व्यवस्थापक पवनकुमार शुक्ला तसेच संस्थेचे इतर मान्यवर सभासद उपस्थित होते. सर्व मान्यवरांनी आश्रमातील मुलांशी संवाद साधत त्यांना पुढील वाटचालीसाठी शुभेच्छा दिल्या.

सामाजिक बांधिलकी जपत, गरजूंना आधार देण्याचा मैत्री आधार सामाजिक संस्थेचा हा उपक्रम परिसरात कौतुकास्पद ठरत असून, “समाजसेवा हीच खरी मानवसेवा” या विचाराला पुन्हा एकदा बळ देणारा ठरला आहे.