आजची समाजसेवा : गरजूंना दिलासा देणारा मोलाचा उपक्रम

आजची समाजसेवा : गरजूंना दिलासा देणारा मोलाचा उपक्रम

कलबुर्गी (कर्नाटक) | प्रतिनिधी

लायन्स क्लब ऑफ पुणे मेट्रोपोलीस या सामाजिक संस्थेमार्फत गरजू आणि आर्थिकदृष्ट्या दुर्बल रुग्णांसाठी आणखी एक स्तुत्य उपक्रम राबविण्यात आला आहे. गरीब रुग्णांना मोफत डायलिसिस उपचार मिळावेत या उद्देशाने श्रीमती पौर्णिमा बिरादार चॅरिटेबल ट्रस्ट संचलित डायलिसिस सेंटर, कलबुर्गी येथे सुमारे आठ लाख रुपये किमतीची अत्याधुनिक डायलिसिस मशीन दिनांक १ मार्च २०२६ रोजी प्रदान करण्यात आली.

या कार्यक्रमास क्लबचे प्रेसिडेंट ला. रामचंद्र माने, खजिनदार नागेंद्र शेरेगर, सिनियर लायन अनुप ठाकूर, सिनियर ला. भरत इंगवले, ला. रोहन, ला. महेश बरगली, ला. शिवलिंग कोटकी, ला. ज्ञानेश्वर गायकवाड, ला. श्रीकांत रेवनार तसेच एक सहकारी मित्र उपस्थित होते.

विशेष म्हणजे, या मशीनसाठी निधी उभारणी व समन्वयामध्ये प्रेसिडेंट रामचंद्र माने यांनी अत्यंत परिश्रम घेतले. त्यांच्या सातत्यपूर्ण प्रयत्नांमुळेच हा उपक्रम यशस्वीरीत्या पूर्णत्वास गेला, अशी भावना उपस्थितांनी व्यक्त केली.

यापूर्वी क्लबच्या वतीने YCM Hospital Pimpri येथे तीन डायलिसिस मशिन देण्यात आल्या आहेत. काल प्रदान करण्यात आलेली ही चौथी मशीन असून, सामाजिक बांधिलकी जपत क्लबने सातत्याने आरोग्य क्षेत्रात भरीव योगदान दिले आहे.

या नवीन मशीनमुळे परिसरातील अनेक गरजू रुग्णांना मोफत व वेळेवर उपचार मिळणार असून, त्यांना मोठा दिलासा मिळणार आहे. लायन्स क्लबच्या या कार्याचे सर्व स्तरातून कौतुक होत आहे.