आंधळगावात राजकीय भूकंप; सरपंच लेंडवे यांच्यासह आवताडे गटाला जाहीर पाठिंबा

आंधळगावात राजकीय भूकंप; सरपंच लेंडवे यांच्यासह आवताडे गटाला जाहीर पाठिंबा

पंढरपुर  (प्रतिनिधी) – मंगळवेढा तालुक्यातील राजकीयदृष्ट्या सतत चर्चेत असलेल्या आंधळगावच्या राजकारणात महत्त्वाची उलथापालथ घडली असून, आगामी जिल्हा परिषद व पंचायत समिती निवडणुकांच्या पार्श्वभूमीवर गावातील राजकीय समीकरणांना नवे वळण मिळाले आहे.

गावाचे माजी सरपंच महादेव माळी, विद्यमान सरपंच लव्हाजी लेंडवे यांच्यासह अनेक कार्यकर्त्यांनी सर्वांगीण विकासाच्या भूमिकेतून भारतीय जनता पार्टीचे आमदार समाधान आवताडे यांच्या गटाला जाहीर पाठिंबा दिला आहे.

आंधळगाव येथे जिल्हा परिषद उमेदवार करुणा शिवशरण व पंचायत समिती उमेदवार विनायक यादव यांच्या प्रचारार्थ आयोजित भव्य सभेत हा निर्णय जाहीर करण्यात आला. सभेत मोठ्या संख्येने कार्यकर्ते व ग्रामस्थ उपस्थित होते. यावेळी उपस्थितांच्या टाळ्यांच्या कडकडाटात सरपंच लव्हाजी लेंडवे यांनी विकासकामांना गती, निधीची उपलब्धता आणि सक्षम नेतृत्व या मुद्द्यांवर भर देत आमदार समाधान आवताडे यांच्या नेतृत्वावर विश्वास व्यक्त केला.

दरम्यान, या निर्णयापूर्वी आंधळगावात कार्यकर्त्यांची विस्तृत बैठक घेण्यात आली होती. त्यामध्ये सखोल चर्चा करून सर्वानुमते भाजपच्या गटाला पाठिंबा देण्याचा निर्णय घेण्यात आल्याची माहिती सरपंच लेंडवे यांनी दिली.

एकेकाळी काँग्रेस व राष्ट्रवादी काँग्रेसचा बालेकिल्ला म्हणून ओळखले जाणारे आंधळगाव आता भाजपच्या विचारसरणीकडे झुकत असल्याचे चित्र दिसत आहे. तसेच भाजपविरोधी गट या निवडणुकीत विखुरलेला दिसत असून त्यांचे स्वतंत्र अस्तित्व टिकवणे आव्हानात्मक ठरण्याची चर्चा गावात रंगू लागली आहे.

या जाहीर पाठिंब्यामुळे जिल्हा परिषद उमेदवार करुणा शिवशरण व पंचायत समिती उमेदवार विनायक यादव यांना निश्चितच मोठे बळ मिळणार असल्याचे राजकीय जाणकारांचे मत आहे. आंधळगावात भाजपचे पारडे जड झाल्याचे स्पष्ट संकेत मिळत असून, आगामी निवडणुकीत हा निर्णय निर्णायक ठरण्याची शक्यता वर्तवण्यात येत आहे.

या घडामोडींमुळे मंगळवेढा तालुक्याच्या राजकारणात नव्या समीकरणांची सुरुवात झाल्याचे चित्र सध्या स्पष्ट होत आहे.