आसबेवाडीतील ४३ शेतकऱ्यांना ‘RAD’ प्रकल्पातून दिलासा; आमदार समाधान आवताडे यांच्या पाठपुराव्याला यश

आसबेवाडीतील ४३ शेतकऱ्यांना ‘RAD’ प्रकल्पातून दिलासा; आमदार समाधान आवताडे यांच्या पाठपुराव्याला यश

मंगळवेढा, प्रतिनिधी :

तालुक्यातील आसबेवाडी येथील शेतकऱ्यांसाठी आनंदाची बातमी समोर आली असून ‘आर.ए.डी.’ (Rainfed Area Development) प्रकल्पांतर्गत गावातील ४३ शेतकऱ्यांच्या खात्यावर प्रत्येकी ३० हजार रुपये जमा करण्यात आले आहेत. या योजनेसाठी आमदार समाधान दादा आवताडे यांनी केलेल्या सातत्यपूर्ण पाठपुराव्याला अखेर यश मिळाले आहे.

कृषी विभागामार्फत राबविण्यात येणाऱ्या या योजनेसाठी मंगळवेढा तालुक्यातून केवळ एका गावाची निवड करण्यात आली होती. यावेळी आमदार आवताडे यांनी आसबेवाडी गावाचा आग्रह धरत प्रशासनाकडे वारंवार पाठपुरावा केला. त्यांच्या विशेष शिफारशीमुळे अखेर या योजनेचा संपूर्ण लाभ आसबेवाडीला मिळाला.

योजनेची ठळक वैशिष्ट्ये :

• निवडलेले गाव : आसबेवाडी (तालुक्यातील एकमेव गाव)
• लाभार्थी : ४३ शेतकरी
• आर्थिक मदत : प्रत्येकी ₹३०,०००
• उद्देश : कोरडवाहू क्षेत्र विकास व शाश्वत शेतीला चालना

या निधीमुळे अल्पभूधारक व गरजू शेतकऱ्यांना मोठा आर्थिक आधार मिळणार असून आधुनिक शेती अवजारे, सुधारित बियाणे तसेच पूरक व्यवसायासाठी या रकमेचा उपयोग होणार आहे. त्यामुळे गावात समाधानाचे वातावरण असून शेतकऱ्यांनी आमदार आवताडे यांचे आभार मानले आहेत.

याबाबत बोलताना आमदार समाधान आवताडे म्हणाले, “शेतकऱ्यांच्या सर्वांगीण विकासासाठी आम्ही कटिबद्ध आहोत. आसबेवाडीतील शेतकऱ्यांना या योजनेचा लाभ मिळवून देता आला, याचा आनंद आहे. पुढील काळात तालुक्यातील इतर गावांसाठीही अशाच योजना राबविण्याचा आमचा मानस आहे.”

दरम्यान, या योजनेसाठी रमेश मोरे यांनीही सक्रिय प्रयत्न केल्याची माहिती समोर आली आहे.