भरधाव कंटेनरची दुचाकीला धडक; आसबेवाडीतील दोघांचा मृत्यू

भरधाव कंटेनरची दुचाकीला धडक; आसबेवाडीतील दोघांचा मृत्यू

बातमी:

मंगळवेढा (प्रतिनिधी) : मंगळवेढा–मरवडे मार्गावर भरधाव वेगाने येणाऱ्या कंटेनरने दुचाकीला पाठीमागून जोरदार धडक दिल्याने आसबेवाडीतील दोघांचा मृत्यू झाल्याची दुर्दैवी घटना रविवारी सायंकाळी सुमारे ४.३० वाजता घडली.

या प्रकरणी कंटेनर चालकाविरुद्ध मंगळवेढा पोलिस ठाण्यात गुन्हा दाखल करण्यात आला आहे. फिर्याद तानाजी मोरे (रा. आसबेवाडी) यांनी दिली आहे.

या अपघातात उमेश गमन खटकाळे (वय ३८) व नारायण रतीलाल आसबे (वय ३५) यांचा मृत्यू झाला. दोघेही मंगळवेढ्यातील आपले काम आटोपून बजाज कंपनीच्या दुचाकीवरून (क्र. MH 13 DG 119) आसबेवाडी गावाकडे परतत होते.

मंगळवेढ्यापासून काही अंतरावर असलेल्या लक्ष्मीदेवी मंदिराजवळ मागून येणाऱ्या टाटा कंपनीच्या कंटेनरने (क्र. MH 04 JK 1401) त्यांच्या दुचाकीला जोरदार धडक दिली.

या धडकेत नारायण आसबे यांचा जागीच मृत्यू झाला, तर उमेश खटकाळे यांचा उपचारादरम्यान मृत्यू झाला.

या प्रकरणी कंटेनर चालक मोहम्मद मकरुद्दीन मोहम्मद साबिरुद्दीन (रा. झारखंड) याच्याविरुद्ध बेदरकार व निष्काळजीपणे वाहन चालविल्याप्रकरणी गुन्हा दाखल करण्यात आला असून पुढील तपास पोलिस करत आहेत.