वासुदेवांच्या माध्यमातून मतदान जनजागृती : निवडणुकीची रणधूमाळी सांगवीत सुरू

वासुदेवांच्या माध्यमातून मतदान जनजागृती : निवडणुकीची रणधूमाळी सांगवीत सुरू

पिंपरी चिंचवड │सांगवी : आगामी निवडणुकांच्या पार्श्वभूमीवर नागरिकांमध्ये मतदानाबाबत जागरुकता निर्माण करण्यासाठी सांगवी परिसरात एका वेगळ्या आणि लोकाभिमुख पद्धतीने उपक्रम सुरू करण्यात आला आहे. परंपरागत वासुदेव संस्कृतीचा उपयोग करीत मतदान जनजागृती, मोफत वाय-फाय माहिती, तसेच सरकारी सेवांबाबत माहिती देण्याचा अभिनव उपक्रम आज राबविण्यात आला.

यामध्ये वासुदेव यांनी त्यांच्या पारंपरिक शैलीतून नागरिकांशी संवाद साधत, मतदानाचे महत्त्व, मतदार म्हणून असलेली जबाबदारी आणि लोकतांत्रिक प्रक्रियेबाबत संदेश दिला. त्यासोबतच डिजिटल सुविधांपैकी हर घर इंटरनेट – हर मन कनेक्ट या मोहिमेअंतर्गत फ्री Wi-Fi उपलब्धतेची माहितीही प्रत्यक्ष जाऊन नागरिकांना देण्यात आली.

या उपक्रमाचे सूत्रसंचालन डॉ. धम्मरत्न गायकवाड (युवक शहराध्यक्ष, रिपब्लिकन पार्टी ऑफ इंडिया (आठवले) पिंपरी चिंचवड) यांच्या पुढाकारातून करण्यात आले असून, निवडणुकीकडे जाणाऱ्या वातावरणात नागरिकांमध्ये लोकशाहीविषयी उत्सुकता आणि सहभागी होण्याची भावना निर्माण करणे हा या उपक्रमामागचा मुख्य उद्देश असल्याचे त्यांनी सांगितले.

“निवडणुकीची रणधूमाळी सुरू झाली आहे; मतदान हा अधिकार असून कर्तव्य देखील आहे. प्रत्येक घरापर्यंत माहिती, इंटरनेट व लोकशाही संदेश पोहोचला पाहिजे,” असे प्रतिपादन गायकवाड यांनी केले.

उपस्थित नागरिकांनी हा उपक्रम उत्साहाने स्वीकारत सांस्कृतिक माध्यमातून समाजजागृती घडवणारी ही नवी पद्धत अत्यंत प्रभावी ठरत असल्याचे समाधान व्यक्त केले.