साक्ष बदलण्यासाठी धमक्या? आवारे खून खटल्यात साक्षीदारांची सुरक्षा ऐरणीवर
साक्ष बदलण्यासाठी धमक्या? आवारे खून खटल्यात साक्षीदारांची सुरक्षा ऐरणीवर
आवारे यांची १२ मे २०२३ रोजी तळेगाव नगरपरिषदेसमोर गोळ्या झाडून हत्या झाली होती. या प्रकरणाचा सत्र खटला क्रमांक ५४/२०२३ वडगाव मावळ येथील अतिरिक्त सत्र न्यायालयात सुरू आहे. प्रकरणातील इलेक्ट्रॉनिक पुरावे आणि प्रत्यक्षदर्शी साक्षीदारांचे जबाब महत्त्वाचे असल्याने त्यांना सातत्याने पोलिस संरक्षण देण्याची मागणी यावेळी करण्यात आली. साक्षीदार मोहसीन मुलाणी यांनी हत्येपूर्वी कटाची माहिती मिळाल्याचा आणि आवारे यांना सावध केल्याचा दावा केला. तसेच सुधाकर शेळके यांनी आवारे यांच्या हत्येसाठी २० लाख रुपये दिल्याचे आपल्या समक्ष पाहिल्याचा आरोप त्यांनी केला.
या प्रकरणातील प्रत्यक्षदर्शी साक्षीदार आकाश जगताप यांनी घटनेचे मोबाईलमध्ये व्हिडिओ रेकॉर्डिंग केल्याचा दावा करण्यात आला. संदीप गराडे यांनी डोक्याला बंदूक लावून साक्ष देऊ नये, अशी धमकी दिल्याचा आरोप जगताप यांनी केला आहे. तर अनिल पवार यांनी पोलिस संरक्षण काढून घेतल्याचा तसेच राजकीय पदाचा गैरवापर करून आपल्यावर मोक्का कायद्यांतर्गत कारवाई केल्याचा आरोप केला. दत्तात्रय पारगे यांनीही जानेवारी २०२६मध्ये खोटी साक्ष देण्यासाठी दबाव आणल्याचा आणि ३० मार्च रोजी मध्यरात्री घरी येऊन धमकी दिल्याचा दावा केला. मिलिंद अच्युत यांनीही धमकी मिळाल्याचे न्यायालयाच्या निदर्शनास आणून दिल्याचे पत्रकार परिषदेत सांगण्यात आले.
साक्षीदारांच्या सुरक्षेचा प्रश्न पुन्हा ऐरणीवर आणत धमकी देणाऱ्यांवर तातडीने कारवाई करावी, महत्त्वाच्या साक्षीदारांना सातत्याने पोलिस संरक्षण द्यावे आणि त्यांच्या सुरक्षेची जबाबदारी निश्चित करावी, अशी मागणी करण्यात आली. पत्रकार परिषदेला आकाश जगताप, मोहसीन मुलाणी, अनिल पवार, मिलिंद अच्युत, दत्ता पारगे, निलेश पारगे, सुनिल करंडे आदी उपस्थित होते. दरम्यान, २० लाख रुपयांचा व्यवहार, धमक्यांचे आरोप, पोलिस संरक्षण काढल्याचा दावा आणि मोक्का कारवाईबाबत करण्यात आलेले आरोप हे संबंधित व्यक्तींचे दावे असून त्यांची स्वतंत्र न्यायालयीन पडताळणी होणे बाकी आहे. या प्रकरणाची उच्च न्यायालयातील पुढील सुनावणी २४ सप्टेंबर २०२६ रोजी, तर सत्र न्यायालयातील सुनावणी १ ऑक्टोबर २०२६ रोजी होणार आहे.
संपादक : भाग्यश्री बि एम/ Golden Penn
