कौशल्याधारित शिक्षण ग्रामीण भागापर्यंत पोहोचवा; चंद्रकांत पाटील

कौशल्याधारित शिक्षण ग्रामीण भागापर्यंत पोहोचवा; चंद्रकांत पाटील

पुणे प्रतिनिधी : सध्याच्या काळात कौशल्य विकासाला मोठे महत्त्व आहे. ग्रामीण भागातील विद्यार्थ्यांना कौशल्याधारित शिक्षण व प्रशिक्षण मिळावे, यासाठी शैक्षणिक संस्थांनी पुढाकार घ्यावा. त्यासाठी शासनाकडून आवश्यक सुविधा व प्रोत्साहनपर योजना उपलब्ध करून दिल्या जातील, अशी ग्वाही उच्च व तंत्रशिक्षण मंत्री चंद्रकांत पाटील यांनी दिली.

सिम्बायोसिस स्किल्स अँड प्रोफेशनल युनिव्हर्सिटीच्या कुलपतीपदी डॉ. स्वाती मुजुमदार यांची नियुक्ती झाल्याबद्दल त्यांचा चंद्रकांत पाटील यांच्या हस्ते गौरव करण्यात आला. यावेळी कौशल्य विकास मंत्री मंगल प्रभात लोढा, सिम्बायोसिसचे अध्यक्ष डॉ. शां. ब. मुजुमदार, संजीवनी मुजुमदार यांच्यासह मान्यवर उपस्थित होते.

कौशल्य आत्मसात केलेली युवा पिढी स्वतःचा तसेच समाजाचा आणि देशाचा विकास घडवू शकते. त्यामुळे ग्रामीण विद्यार्थ्यांपर्यंत प्रशिक्षण पोहोचविण्यासाठी संस्थांनी पुढाकार घेणे गरजेचे आहे. डॉ. स्वाती मुजुमदार यांनी कौशल्य विकासाच्या क्षेत्रात जागतिक पातळीवर योगदान दिले असून, त्यांच्या नेतृत्वाखाली विद्यापीठाची प्रगती अधिक वेगाने होईल, असा विश्वास पाटील यांनी व्यक्त केला.

महाराष्ट्राला कौशल्य विकासाच्या क्षेत्रात अग्रेसर करण्याचे मुख्यमंत्री देवेंद्र फडणवीस यांचे स्वप्न सिम्बायोसिस व मुजुमदार परिवाराने पुढे नेले आहे. विद्यापीठातील अभ्यासक्रम उद्योगांच्या गरजेनुसार तयार केले जात असून, २०० हून अधिक आघाडीच्या उद्योगांशी सहकार्य करार झाले आहेत. तळागाळातील विद्यार्थ्यांसाठी पदविका अभ्यासक्रमही सुरू करण्यात आले आहेत. त्यात ९० टक्के महिलांचा सहभाग असून, प्रशिक्षण घेतलेल्या २५ टक्के विद्यार्थ्यांनी स्वतंत्र व्यवसाय सुरू केला आहे.