जनतेच्या विश्वासाची कमाई; कुंदाताई भिसेंचा NCMC उपक्रम ठरला सुपरहिट

पिंपळे सौदागर (प्रतिनिधी) : नागरिकांना आधुनिक, सुलभ आणि डिजिटल सार्वजनिक वाहतूक सुविधांचा लाभ मिळावा या उद्देशाने नगरसेविका डॉ. सौ. कुंदाताई संजय भिसे यांच्या पुढाकारातून आयोजित मोफत NCMC (National Common Mobility Card) कार्ड वाटप शिबिराच्या दुसऱ्या टप्प्यात ८०० नागरिकांना कार्डांचे वितरण करण्यात आले. यापूर्वी पहिल्या टप्प्यात ६०० नागरिकांना कार्डे देण्यात आली होती. त्यामुळे दोन्ही टप्प्यांमध्ये मिळून एकूण १,४०० नागरिकांना या सुविधेचा लाभ मिळाला.

NCMC हे ‘वन नेशन, वन कार्ड’ या संकल्पनेवर आधारित असून, या कार्डाच्या माध्यमातून मेट्रो, बस तसेच भविष्यात विविध सार्वजनिक वाहतूक सेवांमध्ये एकाच कार्डाचा वापर करता येणार आहे. यामुळे डिजिटल व्यवहारांना चालना मिळण्यासोबतच नागरिकांचा वेळ वाचणार असून तिकीटासाठी रांगेत उभे राहण्याची गरज कमी होणार आहे. रोख व्यवहारांवरील अवलंबित्व कमी होऊन सुरक्षित, पारदर्शक आणि सुलभ प्रवासाचा अनुभव नागरिकांना मिळणार आहे.

शिबिरात पात्र लाभार्थ्यांना नियोजनबद्ध आणि शिस्तबद्ध पद्धतीने कार्डांचे वितरण करण्यात आले. संपूर्ण प्रक्रिया सुरळीत पार पडल्याने नागरिकांनी समाधान व्यक्त केले. केंद्र व राज्य शासनाच्या डिजिटल इंडिया उपक्रमाला बळ देणारे हे कार्ड भविष्यातील स्मार्ट नागरी जीवनाचा महत्त्वाचा भाग ठरणार असल्याचेही यावेळी सांगण्यात आले.

यावेळी नगरसेविका डॉ. सौ. कुंदाताई संजय भिसे म्हणाल्या, “नागरिकांना शासनाच्या आधुनिक आणि डिजिटल सुविधांचा लाभ घराजवळ उपलब्ध करून देणे ही आमची प्राथमिकता आहे. पहिल्या टप्प्यात ६०० आणि दुसऱ्या टप्प्यात ८०० अशा एकूण १,४०० नागरिकांना NCMC कार्डांचे वितरण करण्यात आले आहे. भविष्यातही नागरिकांच्या हिताचे आणि त्यांच्या दैनंदिन जीवनात सकारात्मक बदल घडवून आणणारे उपक्रम सातत्याने राबवत राहू.”