नवी सांगवीत अण्णाभाऊ साठे यांची १०६ वी जयंती उत्साहात साजरी

नवी सांगवीत अण्णाभाऊ साठे यांची १०६ वी जयंती उत्साहात साजरी

पिंपळे गुरव : साई चौक येथील लोकनेते आमदार लक्ष्मणभाऊ जगताप भाजी मार्केटमध्ये आमदार शंकरभाऊ जगताप यांच्या मार्गदर्शनाखाली साहित्यरत्न, लोकशाहीर अण्णाभाऊ साठे यांची १०६ वी जयंती उत्साहात साजरी करण्यात आली. यावेळी भाजी मार्केटचे अध्यक्ष संजय मराठे यांच्या हस्ते अण्णाभाऊ साठे यांच्या प्रतिमेस पुष्पहार अर्पण करून अभिवादन करण्यात आले. तसेच उपस्थितांना पेढे वाटून आनंदोत्सव साजरा करण्यात आला.

लोकनेते आमदार लक्ष्मणभाऊ जगताप भाजी मार्केटमधील भाजी विक्रेते व सामाजिक कार्यकर्ते दरवर्षी विविध महापुरुषांच्या जयंती एकत्रितपणे साजऱ्या करतात. यावेळी समाजोपयोगी व समाजप्रबोधनात्मक कार्य करणाऱ्या प्रेरणादायी व्यक्तींचा गौरव व सन्मान करण्याची परंपराही जपली जाते.

यावेळी अध्यक्ष संजय मराठे म्हणाले की, लोकशाहीर अण्णाभाऊ साठे यांनी आपल्या साहित्य, शाहिरी आणि सामाजिक विचारांतून वंचित, शोषित व कष्टकरी समाजाला आवाज दिला. संयुक्त महाराष्ट्र चळवळीत त्यांच्या ओजस्वी शाहिरीने जनजागृती घडवून महाराष्ट्राच्या अस्मितेला बळ दिले. समता, स्वाभिमान आणि सामाजिक न्यायाचा त्यांचा विचार आजही समाजासाठी प्रेरणादायी असून त्यांच्या विचारांचा वारसा जपत सर्वसमावेशक विकासासाठी कार्य करणे हीच त्यांना खरी आदरांजली ठरेल.

या कार्यक्रमास कुणाल धिवार, रमेश डफळ, संदीप पाटील, नितीन कुचेकर, गणेश मते, तौफिक सय्यद, प्रवीण भोसले, जगदीश बच्छाव, अंकुश आपेट, भरत प्रसात, खंडेराव हल्लाले, सयाजी आगलावे, गणेश पैठणी, नितीन दोधाड, वैभव काळे, अरुण जाधव, बपीराम भोंगे, मनोज शिंदे, नवीन खान, एजास शहा, किरण वाणी, विपुल शिंदे, अंजना शिंदे, नंदा जाधव यांच्यासह भाजी विक्रेते, मान्यवर आणि नागरिक मोठ्या संख्येने उपस्थित होते.