पिंपळे गुरव राष्ट्रवादी काँग्रेसच्या जनसेवा सप्ताहात विविध सामाजिक उपक्रम

पिंपरी-चिंचवड शहराच्या सर्वांगीण विकासाचे शिल्पकार लोकनेते स्व. अजितदादा पवार यांच्या जयंतीनिमित्त ‘जनसेवा सप्ताहा’अंतर्गत पिंपळे गुरव राष्ट्रवादी काँग्रेस पार्टीच्या वतीने विविध सामाजिक उपक्रमांचे आयोजन करण्यात आले. ममता अंध-अनाथ आश्रमात फळे व धान्य वाटप, ५ हजार वृक्षरोपांचे वितरण तसेच रक्तदान शिबिरात १३२ रक्तदात्यांनी उत्स्फूर्त सहभाग नोंदवत रक्तदान केले. रक्तदात्यांचा प्रमाणपत्र देऊन सन्मान करण्यात आला.

या उपक्रमांचे उद्घाटन राष्ट्रवादी काँग्रेसचे महापालिकेतील विरोधी पक्षनेते भाऊसाहेब भोईर आणि माजी विरोधी पक्षनेते विठ्ठल (नाना) काटे यांच्या हस्ते झाले. राष्ट्रवादी काँग्रेसचे कार्याध्यक्ष अरुण पवार, शहर उपाध्यक्ष तानाजी जवळकर, माजी नगरसेवक राजू लोखंडे, शंतनू डोळस, अनुसूचित जमाती विभागाचे शहराध्यक्ष विष्णू शेळके यांच्यासह अनेक पदाधिकारी, माजी लोकप्रतिनिधी आणि विविध सामाजिक संस्थांचे प्रतिनिधी यावेळी उपस्थित होते. आश्रमातील विद्यार्थ्यांना अन्नधान्य व फळांच्या किटचे वाटप करण्यात आले, तर पर्यावरण संवर्धनासाठी वृक्षरोपांचे वितरण करण्यात आले.

यावेळी बोलताना भाऊसाहेब भोईर यांनी स्व. अजितदादा पवार यांचा जनसेवेचा वारसा अधोरेखित करत, समाजकारण हीच राष्ट्रवादी काँग्रेसची ओळख असल्याचे सांगितले. नाना काटे यांनी पिंपरी-चिंचवडच्या विकासातील अजितदादांच्या योगदानाची आठवण करून देत त्यांच्या कार्याला भावपूर्ण अभिवादन केले. अरुण पवार यांनी दादांची कार्यशैली, शिस्त आणि सर्वसामान्यांप्रती असलेली बांधिलकी हेच कार्यकर्त्यांसाठी प्रेरणास्थान असल्याचे नमूद केले.

तानाजी जवळकर, राजू लोखंडे, विष्णू शेळके आणि शंतनू डोळस यांनीही स्व. अजितदादा पवार यांच्या कार्याचा गौरव करत त्यांच्या विचारांचा वारसा पुढे नेण्याचा निर्धार व्यक्त केला. सामाजिक बांधिलकी जपत जनसेवा सप्ताहात राबविण्यात आलेल्या उपक्रमांना नागरिकांचा उत्स्फूर्त प्रतिसाद लाभला असून, वृक्षरोप वितरणासाठी नागरिक व पर्यावरणप्रेमींनी मोठी गर्दी केली.