मैत्री आधारचा मदतीचा हात; आठ गरजू कुटुंबांना धान्यकिट वाटप

वेल्हे, प्रतिनिधी :
समाजातील गरजू, वंचित आणि दुर्बल घटकांना आधार देण्याच्या उद्देशाने कार्यरत असलेल्या मैत्री आधार सामाजिक संस्था, पिंपळे निलख यांच्या वतीने वेल्हे तालुक्यातील विंझर गावातील आठ गरजू कुटुंबांना एक महिन्यासाठी पुरेल एवढ्या जीवनावश्यक वस्तूंच्या रेशनिंग किटचे वाटप करण्यात आले.

संस्थेने गेल्या दोन वर्षांपासून वृद्धाश्रम, अनाथ, अपंग, अंध तसेच आर्थिकदृष्ट्या दुर्बल कुटुंबांना सातत्याने मदतीचा हात दिला आहे. रविवारी आयोजित करण्यात आलेल्या या उपक्रमामुळे लाभार्थी कुटुंबांच्या चेहऱ्यावर आनंदाचे भाव उमटले. वाढत्या महागाईच्या काळात मिळालेल्या या मदतीमुळे कुटुंबांना मोठा दिलासा मिळाला.

या वेळी संस्थेचे राजेंद्र टकले, संदीप लक्ष्मण कामठे, बाळासाहेब धरपळे आणि भरत इंगवले उपस्थित होते. तसेच विंझर गावातील सामाजिक कार्यकर्ते लिम्हण काका आणि विजेंद्र भोसले यांनी या उपक्रमाच्या यशस्वी आयोजनासाठी मोलाचे सहकार्य केले.

मैत्री आधार सामाजिक संस्थेने मागील दोन वर्षांत जवळपास २८ अनाथ संस्थांना मदतीचा हात दिला असून समाजोपयोगी उपक्रमांमुळे संस्थेचे कार्य पंचक्रोशीत विशेष कौतुकास पात्र ठरत आहे. गरजूंना मदत करून सामाजिक बांधिलकी जपणाऱ्या या संस्थेच्या कार्याबद्दल नागरिकांकडून समाधान व्यक्त करण्यात येत आहे.