मंगळवेढ्याच्या राजकारणातील मजबूत स्तंभ कोसळला; दादासाहेब गरंडे यांचे निधन

मंगळवेढ्याच्या राजकारणातील मजबूत स्तंभ कोसळला; दादासाहेब गरंडे यांचे निधन

मंगळवेढा / प्रतिनिधी :

मंगळवेढा तालुक्याच्या दक्षिण भागातील राजकीय आणि सामाजिक क्षेत्रात प्रभावी नेतृत्व म्हणून ओळख असलेले मंगळवेढा तालुका पंचायत समितीचे माजी उपसभापती दादासाहेब गरंडे यांचे दुर्दैवी निधन झाले. सोलापूर येथील अश्विनी रुग्णालयात उपचार सुरू असताना त्यांनी अखेरचा श्वास घेतला. त्यांच्या निधनाने मंगळवेढा तालुक्यात शोककळा पसरली असून राजकीय व सामाजिक क्षेत्रात मोठी पोकळी निर्माण झाल्याची भावना व्यक्त केली जात आहे.

तालुक्याच्या दक्षिण भागात ‘ढाण्या वाघ’ म्हणून ओळख असलेले दादासाहेब गरंडे हे अत्यंत कर्तव्यदक्ष आणि जनसंपर्क असलेले नेते म्हणून प्रसिद्ध होते. त्यांनी आपल्या कार्यकाळात जनतेच्या प्रश्नांसाठी सातत्याने लढा दिला. विशेषतः नंदेश्वर ग्रामपंचायतीमध्ये त्यांनी दीर्घकाळ नेतृत्व करत स्थानिक राजकारणावर आपली मजबूत पकड निर्माण केली होती. जवळपास ३५ वर्षे त्यांच्या नेतृत्वाखाली ग्रामपंचायतीत वर्चस्व राहिले, असे स्थानिक नागरिकांकडून सांगितले जाते.

तसेच भोसे जिल्हा परिषद गटात त्यांच्या नेतृत्वावर विश्वास ठेवून सलग २५ वर्षे प्रतिनिधी निवडून येत असल्याने त्यांच्या राजकीय ताकदीचा अंदाज येतो. तालुक्यातील अनेक निर्णयप्रक्रियांमध्ये त्यांचा प्रभाव दिसून येत होता.

त्यांच्या निधनाची बातमी समजताच मंगळवेढा, नंदेश्वर परिसर तसेच उपनगरांमध्ये शोककळा पसरली. “परिसराने एक सक्षम नेतृत्व गमावले आहे” अशी भावना अनेकांनी व्यक्त केली असून विविध स्तरांतून त्यांना श्रद्धांजली वाहण्यात येत आहे.

दादासाहेब गरंडे यांच्या निधनामुळे तालुक्यातील राजकीय व सामाजिक जीवनावर दीर्घकालीन परिणाम होणार असल्याची चर्चा नागरिकांमध्ये सुरू आहे.