आई कलाग्राम फाउंडेशनचा ‘मला व्यक्त व्हायचंय’ उपक्रम : महिलांच्या आत्मविश्वासाला नवी उमेद

आई कलाग्राम फाउंडेशनचा ‘मला व्यक्त व्हायचंय’ उपक्रम : महिलांच्या आत्मविश्वासाला नवी उमेद

पुणे :

आई कलाग्राम फाउंडेशनच्या वतीने आयोजित करण्यात आलेल्या ‘मला व्यक्त व्हायचंय’ या अभिनव उपक्रमाला महिलांचा उत्स्फूर्त आणि भरघोस प्रतिसाद लाभला. महिलांना आपल्या भावना, अनुभव व विचार निर्भीडपणे मांडता यावेत, स्वतःची ओळख आणि आत्मविश्वास अधिक दृढ व्हावा, या उद्देशाने हा कार्यक्रम राबविण्यात आला.

विविध वयोगटातील महिलांनी मोठ्या संख्येने सहभाग नोंदवत हा उपक्रम केवळ कार्यक्रम न राहता स्व-अभिव्यक्तीचे प्रेरणादायी व्यासपीठ ठरवला. सहभागी महिलांनी मनमोकळेपणाने संवाद साधत आपल्या आयुष्यातील अनुभव मांडले, तर अनेकांनी या मंचामुळे स्वतःमध्ये सकारात्मक बदल जाणवल्याची भावना व्यक्त केली.

या कार्यक्रमासाठी प्रमुख मार्गदर्शक म्हणून

सौ. वासंती देवळे (कौन्सिलर व मोटिवेशनल स्पीकर),

सौ. स्वाती काशीकर (कौन्सिलर व समाजसेविका)

आणि सौ. सुनीती ताई धायगुडे यांचे प्रभावी व प्रेरणादायी मार्गदर्शन लाभले. त्यांच्या संवादातून महिलांना मानसिक बळ, आत्मविश्वास आणि सकारात्मक दृष्टिकोन मिळाल्याचे सहभागी महिलांनी आवर्जून नमूद केले.

कार्यक्रमाला विशेष उपस्थिती म्हणून सौ. पुष्पाताई कुदळे, सौ. मोडक तसेच सौ. शिल्पा तिकोणे उपस्थित होत्या. महिलांच्या प्रश्नांवर त्यांनी अत्यंत संवेदनशीलतेने विचार मांडत या उपक्रमाचे मनापासून कौतुक केले.

आई कलाग्राम फाउंडेशनच्या संस्थापक अध्यक्ष सौ. सुनीता निंबाळकर यांनी आपल्या मार्गदर्शनपर भाषणात महिलांचे सक्षमीकरण, स्व-अभिव्यक्तीला चालना देणे तसेच पीडित महिलांसाठी खंबीर आधार निर्माण करण्याच्या उद्देशाने असे उपक्रम सातत्याने राबविण्यात येणार असल्याचे स्पष्ट केले.

कार्यक्रमाच्या यशस्वी आयोजनाबद्दल आयोजकांच्या वतीने सहभागी झालेल्या सर्व महिलांचे मनःपूर्वक आभार मानण्यात आले.

आई कलाग्राम फाउंडेशन आयोजित ‘मला व्यक्त व्हायचंय’ उपक्रमात मार्गदर्शक, मान्यवर आणि सहभागी महिलांची प्रेरणादायी उपस्थिती कार्यक्रमाचे वैशिष्ट्य ठरली.