मराठी भाषा गौरवदिन व जागतिक महिला दिनानिमित्त ‘सिद्ध लेखिका’ पुणे शाखेचा कार्यक्रम उत्साहात

मराठी भाषा गौरवदिन व जागतिक महिला दिनानिमित्त ‘सिद्ध लेखिका’ पुणे शाखेचा कार्यक्रम उत्साहात

पिंपरी सौदागर (पुणे) : सिद्ध लेखिका – पुणे शाखेच्या वतीने “मराठी भाषा गौरवदिन” आणि “जागतिक महिला दिन” निमित्त आयोजित करण्यात आलेला पहिलाच साहित्यिक कार्यक्रम मोठ्या उत्साहात पार पडला. कुणाल आयकॉन, पिंपरी सौदागर येथील क्लब हाऊसमध्ये हा कार्यक्रम नियोजनबद्ध आणि साहित्यिक वातावरणात संपन्न झाला.

या कार्यक्रमाला सिद्ध लेखिका संस्थेच्या अध्यक्षा प्रा. पद्मा हुशिंग, पुणे जिल्हा प्रमुख चारूशिला बिवरे, कार्यकारिणी सदस्य प्रा. अर्चना अंबासकर, वर्षा फाटक, यामिनी पाठक, प्रा. गायत्रीताई हेर्लेकर तसेच अश्विनी रानडे, निलिमा विंचू आणि शिल्पा फणसे आदी मान्यवर उपस्थित होते. त्यांच्या पुढाकारातून कार्यक्रमाचे उत्कृष्ट आयोजन करण्यात आले.

कार्यक्रमाचे विशेष आकर्षण म्हणजे यशोवाणी संस्थेच्या संचालिका प्राची गुर्जर यांची प्रा. अर्चना अंबासकर यांनी घेतलेली प्रेरणादायी मुलाखत. या संवादातून त्यांच्या कार्यप्रवासातील अनुभव आणि प्रेरणादायी विचार उपस्थितांसमोर उलगडले. तसेच पुणे शाखेत नव्याने सहभागी झालेल्या लेखिका सख्यांचा परिचय मेळावा आणि मराठी भाषा गौरव दिनानिमित्त ज्ञानपीठ पुरस्कारप्राप्त मराठी साहित्यिकांच्या साहित्यकार्यावर परिसंवादही आयोजित करण्यात आला.

याच वेळी आयोजित निबंध स्पर्धेतील विजेत्यांचा गौरव करण्यात आला. राधिका भाडारकर यांनी प्रथम क्रमांक पटकावला. कार्यक्रमाचे निवेदन वर्षा फाटक यांनी केले, तर आभार प्रदर्शन शिल्पा फणसे यांनी केले. दीपप्रज्वलनापासून पसायदानापर्यंत संपूर्ण कार्यक्रम आनंदी वातावरणात पार पडला. या यशस्वी आयोजनासाठी प्रा. अर्चना अंबासकर, चारूशिला बिवरे आणि वर्षा फाटक यांनी विशेष परिश्रम घेतले.