येत्या २६ टे २९ डिसेंबर दरम्यान मावळभूषण कृष्णराव भेगडे व्याख्यानमालेचे आयोजन

येत्या २६ टे २९ डिसेंबर दरम्यान मावळभूषण कृष्णराव भेगडे व्याख्यानमालेचे आयोजन

तळेगाव दाभाडे, प्रतिनिधी :
येथील इंद्रायणी विद्या मंदिर संस्थेच्या वतीने येत्या २६ ते २९ डिसेंबर दरम्यान इंद्रायणी महाविद्यालयाच्या प्रांगणात ‘मावळभूषण कृष्णराव भेगडे’ जाहीर व्याख्यानमालेचे आयोजन करण्यात आले आहे. व्याख्यानमालेचे हे अकरावे वर्ष आहे.
व्याख्यानमालेचे उद्घाटन २६ डिसेंबर रोजी सकाळी १० वाजता मावळ लोकसभा मतदारसंघाचे खासदार श्रीरंग बारणे यांच्या हस्ते होणार आहे. पहिल्या दिवशी प्रसिद्ध शिवव्याख्याते नितीन बानगुडे पाटील यांचे ‘चला घडवू नवी पिढी’ या विषयावर व्याख्यान होणार आहे.
दि. २७ डिसेंबर रोजी गीता परिवाराचे राष्ट्रीय कार्याध्यक्ष व नामांकित उद्योजक संजय मालपाणी यांचे ‘जानो गीता, बनो विजेता’ या विषयावर व्याख्यान होईल. अध्यक्षस्थानी प्रसिद्ध उद्योजक व कायनेटिक ग्रुपचे अध्यक्ष पद्मश्री अरुण फिरोदिया असणार आहेत.
दि. २८ डिसेंबर रोजी लक्ष्य फाउंडेशनच्या संस्थापिका अनुराधा प्रभुदेसाई यांचे ‘तुमच्या उद्यासाठी आपला आज देणारा सैनिक’ या विषयावर मार्गदर्शन करणार आहेत. बीजमाता पद्मश्री राहीबाई पोपेरे या अध्यक्षस्थान भूषविणार आहेत.
दि. २९ डिसेंबर रोजी समारोपाच्या चौथ्या सत्रामध्ये महाराष्ट्र कामगार साहित्य परिषद पुणे व इंद्रायणी महाविद्यालय तळेगाव दाभाडे यांच्या संयुक्त विद्यमाने राज्यस्तरीय गदिमा कविता महोत्सव (वर्ष ३३ वे) आयोजित करण्यात आलेला आहे. यावेळी महाराष्ट्र कामगार साहित्य परिषदेच्या माध्यमातून समाजमान्य व्यक्तिमत्त्वांना गदिमा जीवनगौरव सन्मान, गदिमा स्नेहबंध सन्मान, महाराष्ट्र लावणी सम्राज्ञी पुरस्कार, गदिमा चैत्रबन पुरस्कार, गदिमा काव्य साधना पुरस्कार आदी पुरस्कार प्रदान करण्यात येणार आहेत. तसेच काही विशेष निमंत्रित कवींचे काव्य संमेलन आयोजित करण्यात आले आहे.
या व्याख्यानमालेचा उपस्थित राहून वैचारिक आनंद घेण्याचे आवाहन संस्थेचे अध्यक्ष रामदास काकडे, सचिव चंद्रकांत शेटे, खजिनदार निरूपा कानिटकर, व्याख्यानमालेच्या संयोजन समितीचे अध्यक्ष व संस्थेचे उपाध्यक्ष शैलेश शहा, इंद्रायणी महाविद्यालयाचे प्राचार्य व संयोजक डॉ. संभाजी मलघे, महाराष्ट्र कामगार साहित्य परिषदेचे अध्यक्ष पुरुषोत्तम सदाफुले, कार्याध्यक्ष राजेंद्र वाघ, मुख्य समन्वयक बाजीराव सातपुते, उपाध्यक्ष अरुण गराडे, समन्वयक इंद्रजीत पाटोळे, यशोदा महादेव काकडे कॉलेज ऑफ इंजीनिअरिंग कॉलेजचे प्राचार्य डॉ. साहेबराव पाटील, फार्मसी महाविद्यालयाचे प्राचार्य डॉ. संजय आरोटे यांनी केले आहे.

कार्यवाह चंद्रकांत शेटे यांना गदिमा स्नेहबंध पुरस्कार :
गदिमा स्नेहबंध पुरस्कार इंद्रायणी विद्या मंदिर संस्थेचे कार्यवाह चंद्रकांत शेटे यांना प्रदान करण्यात येणार आहे. समारंभात अध्यक्ष म्हणून ज्येष्ठ कवी विठ्ठल वाघ उपस्थित राहणार असून माजी संमेलनाध्यक्ष कविवर्य फ.मु.शिंदे हे प्रमुख पाहुणे असणार आहेत.

इंद्रायणी विद्या मंदिर पुरस्कारांची घोषणा :
इंद्रायणी विद्या मंदिर संस्थेचा इंद्रायणी विद्या मंदिर पुरस्कार संत साहित्याचे गाढे अभ्यासक सदानंद मोरे यांना, उद्योग क्षेत्रातील पुरस्कार उद्धव चितळे यांना, पर्यावरण क्षेत्रातील पुरस्कार गिरीश खेर यांना, तर क्रीडा क्षेत्रातील पुरस्कार भारतीय खो-खो संघाची कर्णधार व इंद्रायणी महाविद्यालयाची माजी विद्यार्थिनी प्रियंका इंगळे यांना जाहीर करण्यात आला आहे.