फ्लश सेव्ह वॉटर अभियान”मुळे एका सोसायटीतच दररोज ६४० लिटर पाणी बचत

फ्लश सेव्ह वॉटर अभियान”मुळे एका सोसायटीतच दररोज ६४० लिटर पाणी बचत

पिंपळे सौदागर (ता. २८, प्रतिनिधी):

पाणी टंचाईच्या पार्श्वभूमीवर उन्नती सोशल फाउंडेशनच्या वतीने “फ्लश सेव्ह वॉटर अभियान” हा साधा, कमी खर्चिक आणि परिणामकारक उपक्रम सुरू करण्यात आला आहे. या अभियानाची सुरुवात पिंपरी-चिंचवडमधील पारस रिवेरा सोसायटीत करण्यात आली असून, नागरिकांमध्ये पाणी बचतीबाबत जनजागृती निर्माण करण्याचा यामागील उद्देश आहे.

या उपक्रमांतर्गत घरातील टॉयलेटच्या फ्लश टँकमध्ये एक लिटर पाण्याने भरलेली प्लास्टिकची बाटली ठेवण्याचे आवाहन करण्यात आले आहे. या छोट्या उपायामुळे प्रत्येक फ्लशवेळी सुमारे एक लिटर पाणी कमी वापरले जाते आणि मोठ्या प्रमाणावर पाणी बचत शक्य होते.

पारस रिवेरा सोसायटीतील ४० फ्लॅट्समध्ये हा उपक्रम राबविण्यात आला असून, सरासरी वापर लक्षात घेतल्यास दररोज सुमारे ६४० लिटर पाण्याची बचत होत आहे. महिन्याभरात ही बचत तब्बल १९,२०० लिटरपर्यंत पोहोचत असून, हा छोटासा बदल जलसंधारणासाठी महत्त्वपूर्ण ठरत आहे.

या उपक्रमाबाबत बोलताना डॉ. कुंदाताई संजय भिसे यांनी प्रत्येक नागरिकाने अशा साध्या उपाययोजना अवलंबल्यास मोठ्या प्रमाणावर पाणी बचत शक्य असल्याचे सांगितले. तसेच हा उपक्रम संपूर्ण शहरात राबवण्याचा मानस व्यक्त करण्यात आला असून, सहभागी नागरिकांना प्रमाणपत्र आणि सोसायटींना डस्टबीन देऊन प्रोत्साहन दिले जाणार असल्याची माहिती संस्थापक संजय भिसे यांनी दिली.