जीवनज्योती हॉस्पिटलमध्ये यशस्वी शस्त्रक्रिया; ६६ वर्षीय महिलेच्या उदरातील ४ किलोचा ट्यूमर काढला

पिंपळे सौदागर (प्रतिनिधी) :

पिंपळे सौदागर येथील जीवनज्योती सुपर स्पेशालिटी हॉस्पिटलमध्ये दुर्मीळ आणि गुंतागुंतीची शस्त्रक्रिया यशस्वीपणे पार पडली. डॉक्टरांनी ६६ वर्षीय महिलेच्या उदरातील सुमारे ४ किलो वजनाचा ओव्हेरियन ट्यूमर काढून तिचे प्राण वाचवले. काही काळापासून रुग्णाला पोटात सूज व अस्वस्थता जाणवत होती; मात्र शस्त्रक्रियेची भीती असल्याने सुरुवातीला त्यांनी रुग्णालयात दाखल होण्यास नकार दिला होता. डॉक्टरांच्या समुपदेशनानंतर त्यांनी शस्त्रक्रियेस संमती दिली.

ही गुंतागुंतीची शस्त्रक्रिया सर्जन डॉ. प्रशांत केदारी आणि स्त्रीरोग तज्ज्ञ डॉ. क्षितिजा गायके यांच्या नेतृत्वाखाली पार पडली. एक्सप्लोरेटरी लॅपरोटॉमी करून ओव्हेरियन ट्यूमर काढण्यात आला तसेच ओमेंटल बायोप्सी करण्यात आली. शस्त्रक्रियेदरम्यान रुग्णाच्या अपेंडिक्समध्ये अनेक दगड (मल्टिपल अपेंडिकोलिथ) आढळल्यामुळे अपेंडिक्सही काढण्यात आले. भूलतज्ज्ञ डॉ. प्रवीण थोरात यांनी या प्रक्रियेत महत्त्वाची भूमिका बजावली.

विशेष म्हणजे इतक्या मोठ्या शस्त्रक्रियेदरम्यान केवळ सुमारे १०० मिलीपेक्षा कमी रक्तस्राव झाला. शस्त्रक्रियेनंतर रुग्णाची प्रकृती स्थिर असून त्या सुरक्षित असल्याची माहिती देण्यात आली. या शस्त्रक्रियेची माहिती जीवनज्योती हॉस्पिटलचे चीफ ऑपरेशन ऑफिसर संदीप कांबळे यांनी पत्रकार परिषदेत दिली. डॉक्टर, परिचारिका आणि संपूर्ण वैद्यकीय टीमच्या समन्वयामुळे ही शस्त्रक्रिया यशस्वी झाली असल्याचे त्यांनी सांगितले.