रन टू फीड मॅरेथॉनमध्ये 2,500 हून अधिक धावपटूंचा सहभाग; फिटनेस आणि भूकमुक्त समाजासाठी पुणे एकवटले

रन टू फीड मॅरेथॉनमध्ये 2,500 हून अधिक धावपटूंचा सहभाग; फिटनेस आणि भूकमुक्त समाजासाठी पुणे एकवटले

पिंपरी, पुणे :

फिटनेस, समावेशकता आणि सामाजिक जबाबदारी यांचा प्रभावी संगम साधत 2,500 हून अधिक नागरिकांनी रन2फीड मॅरेथॉनमध्ये उत्स्फूर्त सहभाग नोंदवला. ही मॅरेथॉन रविवार, 8 फेब्रुवारी 2026 रोजी बालासाहेब कुंजीर क्रीडांगण, पिंपरी येथे मोठ्या उत्साहात पार पडली. “Turning Miles into Meals” (प्रत्येक पावलातून अन्नाची निर्मिती) या प्रेरणादायी संकल्पनेतून या उपक्रमाने धावण्याला सामाजिक बांधिलकीची जोड दिली.

या मॅरेथॉनमध्ये 1 किमी, 2 किमी, 3 किमी, 5 किमी, 10 किमी आणि हाफ मॅरेथॉन (21 किमी) अशा विविध अंतरांच्या श्रेणी ठेवण्यात आल्या होत्या. त्यामुळे शालेय विद्यार्थी, युवक, ज्येष्ठ नागरिक, प्रथमच धावणारे, फिटनेसप्रेमी तसेच व्यावसायिक धावपटूंना सहभागाची संधी मिळाली.

या कार्यक्रमाचे विशेष आकर्षण म्हणजे महिलांसाठी राखीव “SHE RUN’s” ही विशेष श्रेणी होती. महिलांचे आरोग्य, स्व-काळजी आणि सक्षमीकरण यांना प्रोत्साहन देणाऱ्या या उपक्रमात विविध क्षेत्रांतील महिलांनी मोठ्या संख्येने सहभाग घेतला.

या मॅरेथॉनचे आयोजन इस्कॉन BCEC पुणेच्या ‘फूड फॉर लाइफ’ कार्यक्रमांतर्गत करण्यात आले होते. यासाठी पिंपरी-चिंचवड महानगरपालिका (PCMC) यांचे सक्रिय सहकार्य लाभले. स्पर्धकांच्या सुरक्षिततेसाठी आणि वैद्यकीय सज्जतेसाठी आदित्य बिर्ला मेमोरियल हॉस्पिटल हे कार्यक्रमाचे हेल्थ पार्टनर होते.

कार्यक्रमास नगरसेविका सौ. कुंदाताई भिसे, उन्नती सोशल फाउंडेशनचे अध्यक्ष श्री. संजय भिसे, PCMC आरोग्य विभागातील श्री. घाटे, ब्रिजस्टोन पुणेचे व्यवस्थापकीय संचालक श्री. मोइत्रा, तसेच विविध शैक्षणिक संस्थांचे प्रतिनिधी उपस्थित होते. यावेळी स्वच्छ भारत अभियानाअंतर्गत शपथविधी देखील पार पडला.

उत्तम वाहतूक व्यवस्थापन, पाणीपुरवठा केंद्रे, वैद्यकीय मदत आणि स्वयंसेवकांच्या सहकार्यामुळे हा उपक्रम अत्यंत यशस्वी ठरला. ‘Run Against Hunger’ हा संदेश देत मॅरेथॉनची सांगता झाली.