मराठी पत्रकार संघाच्या पुणे जिल्हाध्यक्षपदी संजय मराठे यांची नियुक्ती

मराठी पत्रकार संघाच्या पुणे जिल्हाध्यक्षपदी संजय मराठे यांची नियुक्ती

नवी सांगवी : पिंपळे गुरव येथील सामाजिक कार्यकर्ते तथा ज्येष्ठ पत्रकार संजय मराठे यांची मराठी पत्रकार संघाच्या पुणे जिल्हाध्यक्षपदी नियुक्ती करण्यात आली आहे. मुंबईतील यशवंतराव चव्हाण सेंटर, नरीमन पॉईंट येथे पार पडलेल्या मराठी पत्रकार संघाच्या महाअधिवेशन २०२६ दरम्यान प्रदेशाध्यक्ष किरण जोशी यांच्या हस्ते त्यांना नियुक्तीपत्र प्रदान करण्यात आले.

मंगळवार (दि. ९) रोजी सकाळी ९ ते सायंकाळी ६ या वेळेत हे अधिवेशन उत्साहात पार पडले. कार्यक्रमाच्या अध्यक्षस्थानी राज्यपाल जिष्णू देव वर्मा होते. यावेळी विधानसभेचे अध्यक्ष राहुल नार्वेकर, प्रेरक वक्ते गौर गोपाल दास, सकाळ माध्यम समूहाचे मुख्य संपादक निलेश खरे, एबीपी माझाच्या संपादक सरिता कौशिक, मृणालिनी नानिवडेकर, प्रशांत ननावरे आदी मान्यवर उपस्थित होते.

पत्रकारिता क्षेत्रातील योगदान, सामाजिक प्रश्नांबाबतची संवेदनशीलता आणि संघटनात्मक कार्यातील सक्रिय सहभागाची दखल घेत मराठे यांची पुणे जिल्हाध्यक्षपदी निवड करण्यात आल्याचे यावेळी सांगण्यात आले. नियुक्तीनंतर पत्रकारांचे हक्क, समस्या आणि पत्रकारिता क्षेत्राच्या विकासासाठी कटिबद्ध राहून काम करण्याचा निर्धार त्यांनी व्यक्त केला.

संजय मराठे यांच्या नियुक्तीमुळे पुणे जिल्ह्यातील पत्रकारांमध्ये उत्साहाचे वातावरण निर्माण झाले असून विविध क्षेत्रातील मान्यवरांकडून त्यांच्यावर अभिनंदनाचा वर्षाव होत आहे. कार्यक्रमाचे प्रास्ताविक प्रदेशाध्यक्ष किरण जोशी यांनी केले, तर उपाध्यक्ष विवेक इनामदार यांनी आभार मानले. संदीप चव्हाण यांनी सूत्रसंचालन केले. यावेळी राज्यभरातून आलेल्या पत्रकारांनी विविध प्रश्न मांडले असून पिंपरी-चिंचवड शहरातील अनेक पत्रकार बांधव व भगिनी उपस्थित होते.