गोष्टी विज्ञानाच्या’ पुस्तकातून विद्यार्थ्यांना विज्ञानाची गोडी

कै. शकुंतलाबाई शितोळे विद्यालय, जुनी सांगवी येथे विज्ञान प्रसारक व संशोधक डॉ. नंदा हरम यांच्या ‘गोष्टी विज्ञानाच्या’ या मुलांसाठी लिहिलेल्या पुस्तकाचा प्रकाशन सोहळा विद्यार्थ्यांच्या उपस्थितीत उत्साहात पार पडला. या कार्यक्रमाला संस्थेचे सचिव तुळशीराम नवले तसेच बालवाङ्मय चळवळ चालविणारे साहित्यिक डॉ. दिलीप गरुड हे प्रमुख पाहुणे म्हणून उपस्थित होते. यावेळी प्रशालेचे मुख्याध्यापक शिवाजी माने, माध्यमिक प्रमुख शितोळे मॅडम, साहित्यिक डॉ. उज्ज्वला सहाणे, शामल तांबोळी, विद्या चौगुले, नंदिनी चांदवले, कल्याणी कुलकर्णी व केशव सहाणे आदी मान्यवर उपस्थित होते.

प्रशालेत प्रथमच पुस्तक प्रकाशनाचा कार्यक्रम होत असल्याने विद्यार्थ्यांमध्ये विशेष उत्सुकता पाहायला मिळाली. हे पुस्तक मासिक ऋग्वेद चिल्ड्रन रिलीफ फंड, आजरा तर्फे प्रकाशित करण्यात आले असून त्याचे प्रकाशक सुभाष शंकर विभुते आहेत. विज्ञानाचा प्रसार व्हावा या उद्देशाने या पुस्तकाची किंमत केवळ २५ रुपये ठेवण्यात आली आहे.

कार्यक्रमात बोलताना डॉ. दिलीप गरुड यांनी “विज्ञानाला अध्यात्माची जोड दिल्यास विज्ञानाचा उपयोग दैनंदिन जीवनात अधिक चांगल्या प्रकारे करता येतो,” असे मत व्यक्त केले. कार्यक्रमाध्यक्ष तुळशीराम नवले यांनी विद्यार्थ्यांनी विज्ञानाची आवड जोपासावी व विज्ञानामुळे मानवाची मोठी प्रगती झाल्याचे सांगितले. तसेच कल्याणी कुलकर्णी यांनी अंधश्रद्धेविरोधात विद्यार्थ्यांना जागरूक राहण्याचे आवाहन करत गोष्टीतून त्याची उदाहरणे दिली.

डॉ. सहाणे यांनी वाचनाचे महत्त्व पटवून देत विद्यार्थ्यांना पुस्तके वाचण्याचे आवाहन केले. डॉ. नंदा हरम यांचे हे तेरावे पुस्तक असून भविष्यात शंभराव्या पुस्तकाचे प्रकाशन याच प्रशालेत व्हावे अशी अपेक्षा त्यांनी व्यक्त केली. कार्यक्रमाचे प्रास्ताविक जगताप सर यांनी केले, तर विज्ञानगीत, पुस्तकातील कथेचे अभिवाचन व सूत्रसंचालन संध्या शेवडे यांनी केले. कार्यक्रमाच्या शेवटी मुख्याध्यापक माने सर यांनी आभार मानले.