आम आदमी पार्टीच्या पाठपुराव्याला यश

आम आदमी पार्टीच्या पाठपुराव्याला यश

पिंपळे निलख – विशाल नगर येथे पोलीस चौकी उभारणीस अधिकृत सुरुवात!

पिंपरी प्रतिनिधी :

पिंपळे निलख आणि विशाल नगर परिसरातील नागरिकांच्या सुरक्षिततेसाठी आम आदमी पार्टीने उचललेले ठोस पाऊल अखेर यशस्वी ठरले आहे. दीड वर्षांच्या सातत्यपूर्ण पाठपुरावा, संघर्ष आणि ठाम भूमिकेनंतर या परिसरात नवीन पोलीस चौकी उभारणीच्या कामाला अधिकृत सुरुवात झाली आहे.

आम आदमी पार्टी पिंपरी-चिंचवड शहर व शहराध्यक्ष रविराज काळे यांच्या नेतृत्वाखाली या भागात स्वतंत्र पोलीस चौकीची मागणी सातत्याने प्रशासनाकडे लावून धरली होती. वाढती लोकसंख्या, वाहतुकीची समस्या, तसेच महिला, ज्येष्ठ नागरिक आणि विद्यार्थ्यांच्या सुरक्षिततेचा गंभीर प्रश्न लक्षात घेऊन ही मागणी करण्यात आली होती.

या संदर्भात मुख्यमंत्री आणि पोलीस आयुक्त यांच्याकडे लेखी पत्रव्यवहार करून परिसरातील वास्तव परिस्थिती प्रशासनाच्या निदर्शनास आणून देण्यात आली. मात्र, वारंवार पाठपुरावा करूनही मागणीची दखल न घेतल्याने आम आदमी पार्टीने आमरण उपोषणाचा इशारा दिला. या इशाऱ्यानंतर प्रशासन जागे झाले आणि पिंपळे निलख – विशाल नगर येथे पोलीस चौकी उभारण्याबाबत लेखी आश्वासन देण्यात आले. त्यानंतर उपोषण मागे घेण्यात आले.

1. यानंतर महानगरपालिकेकडून पोलीस प्रशासनाला पोलीस चौकीच्या भाडे निश्चितीबाबत पत्र देण्यात आले आणि त्यानुसार पोलीस चौकी सुरू करण्याची अधिकृत प्रक्रिया सुरू झाली. सध्या संबंधित विभागामार्फत आवश्यक कामकाज सुरू असून लवकरच पोलीस चौकी प्रत्यक्ष कार्यान्वित होणार आहे.

पोलीस चौकी सुरू झाल्यानंतर परिसरातील कायदा-सुव्यवस्था अधिक बळकट होईल, गुन्हेगारी घटनांवर नियंत्रण येईल आणि नागरिकांना तात्काळ पोलीस मदत मिळणे शक्य होणार आहे. विशेषतः महिला, ज्येष्ठ नागरिक व विद्यार्थ्यांसाठी ही चौकी दिलासा ठरणार आहे.

नागरिकांच्या मूलभूत प्रश्नांसाठी नेहमीच ठामपणे उभे राहणारे आम आदमी पार्टी शहराध्यक्ष रविराज काळे यांच्या नेतृत्वाखाली हा निर्णय जनतेच्या सुरक्षिततेसाठी उचललेले एक महत्त्वाचे पाऊल मानले जात आहे.

पुढेही परिसराची सुरक्षितता व सर्वांगीण विकासासाठी आम आदमी पार्टी कटिबद्ध राहील, असा विश्वास यावेळी व्यक्त करण्यात आला.